މާލީ މަޢުލޫމާތު ހިއްސާކުރުމާއި ދިރާސާތައް ކުރުމަށް ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ދެމެދު މިއަދު ފަހުމުނާމާއެއްގައި ސޮއިކޮށްފިއެވެ.
އެމްއެމްއޭގައި ބޭއްވުނު ރަސްމިއްޔާތުގައި އެމްއެމްއޭގެ ފަރާތުން އެމްއޯޔޫގައި ސޮއިކުރެއްވީ ގަވަރނަރ އަޙްމަދު މުނައްވަރެވެ. އަދި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމެވެ. މި ރަސްމިއްޔާތުގައި ދެ މުއައްސަސާގެ އިސް ބޭފުޅުން ބައިވެރިވެ ވަޑައިގެންނެވިއެވެ.
މި ފަހުމުނާމާގެ ދަށުން، އެމްއެންޔޫގެ ދަރިވަރުންނަށް އެމްއެމްއޭގައި އިންޓަރންޝިޕްގެ ފުރުޞަތުތައް ލިބިގެންދާނެއެވެ. މީގެއިތުރުން، މާލީ ދާއިރާއާ ގުޅޭ ދިރާސާތައް ކުރުމާއި ޕްރޮފެޝަނަލް ތަރައްޤީގެ ދާއިރާތަކުގައި ދެ މުއައްސަސާ ގުޅިގެން މަސައްކަތްކުރުމަށް ވަނީ އެއްބަސްވެފައެވެ.
ރަސްމިއްޔާތުގައި ވާހަކަފުޅު ދައްކަވަމުން، ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވީ “އެމްއެމްއޭ ފަދަ މުއައްސަސާތަކާއެކު އެއްބާރުލުން ބޭނުންވާ” ކަމަށެވެ. އަދި މިއީ “މާލީ އަދި ފައިސާގެ ސިޔާސަތުތައް ރަނގަޅު ގޮތުގައި އެކުލަވާލުމަށް މަސައްކަތްކުރުމުގައި ފެކަލްޓީތަކާއި ދަރިވަރުންނަށް ލިބިގެންދާ މުހިންމު ފުރުޞަތެއް” ކަމުގައި ފާހަގަކުރެއްވިއެވެ.
ގަވަރނަރ އަޙްމަދު މުނައްވަރު ވިދާޅުވެފައިވަނީ، މުހިންމު ސިޔާސަތުތަކާ ގުޅޭ ނިންމުންތައް ނިންމުމުގައި ފުންކޮށް ދިރާސާކުރުމާއި ހެކިތަކުގެ މައްޗަށް ބިނާކޮށް ނިންމުމަށްޓަކައި، އެކަޑެމިކް ދާއިރާއާއެކު ގާތުން މަސައްކަތްކުރުމަކީ އެމަނިކުފާނުގެ އަމާޒެއް ކަމަށެވެ.
މި އެއްބަސްވުމަކީ އެކަޑެމިކް ދާއިރާއިން އުނގެނޭ ކަންކަމާއި ޢަމަލީ މައިދާނުގައި ބޭނުންކުރެވޭ ކަންކަމާ ދެމެދު ހުރި ގުޅުން ބަދަހިކޮށް، ސިޔާސަތުތަކާއި ޢަމަލީ މައިދާނުގައި ކުރެވޭ ކަންކަން ވަރުގަދަކުރުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.
ކިޔުންތެރިންގެ ހިޔާލު