ހަމަލާތައް ހުއްޓާލުމުގެ އެއްބަސްވުމުގެ ދަށުން އިސްރާއީލުން މިހާތަނަށް ހަވާލުކުރި މަރުވެފައިވާ 120 މީހުންނަކީ ޖަލުގައި ބޮޑެތި އަނިޔާތައްކޮށް ގަސްތުގައި މަރާލާފައިވާ މީހުން ކަމަށް، ޣައްޒާ ސަރުކާރުގެ މީޑިއާ އޮފީހުން ތުހުމަތު ކޮށްފިއެވެ.

ޣައްޒާ މީޑިއާ އޮފީހުން ބުނެފައިވަނީ، ގަސްތުގައި ރާވައިގެން އެމީހުންނަށް ލާއިންސާނީ އަނިޔާކޮށް މަރާލާފައިވާ ކަމުގެ ސާފު ހެކިތައް ފެންނާން އެބަހުރި ކަމަށެވެ.

އެގޮތުން ފާހަގަކޮށްފައިވާ ކަންކަމުގެ ތެރޭގައި، މަރުވެފައިވާ މީހުންގެ ކަރުގައި ވާޖަހައި އެލުވައި ދަންޖައްސާފައިވާ ކަމުގެ ނިޝާނާއި، ވަރަށް ގާތުން ބަޑިޖަހައި މަރާލާފައިވާކަމުގެ ނިޝާނާއި، ދެއަތާއި ދެފައި ބަނދެ މަރާލާފައިވުމާއި، ކަނުބަނދެ މަރާލުމާއި އަދި އަސްކަރީ ޓެންކް ބައެއް މީހުންގެ ގައިމަތިން ދުއްވައި މަރާލާފައިވުމާއި، ގުނަވަންތައް ބިންދައި، އަލިފާންޖަހައި އަންދައި ބޮޑެތި ޒަޚަމްތައް ދީފައިވުމަކީ ބޮޑެތި އަނިކޮށް އެމީހުން މަރާލިކަން ހާމަވާ ހެކިތައް ކަމަށް ޣައްޒާ މީޑިއާ އޮފީހުން ބުނެފައި ވެއެވެ.

މިއީ، އެއްވެސް ސުލޫކެއް، އަޚުލާގެއްނެތް ޒަޔަނިސްޓު އަސްކަރިއްޔާއިން ހިންގާފައިވާ ނަސްލުނައްތާލުމުގެ ހަނގުރާމައިގެ ޖަރީމާތަކެއް ކަމަށް ބުނެ، ހަމާސްއިން އިސްރާއީލު ވަރަށް ބޮޑަށް ކުށްވެރި ކޮށްފައި ވެއެވެ.

ފަލަސްތީނު ގައިދީންނަށް އިސްތިއުމާރީ އިސްރާއީލުން ކޮށްފައިވާ ލާއިންސާނީ ޖަރީމާތަކުގެ މިނިވަން ތަހްގީގެއް ހިންގަން، ބައިނަލްއަގްވާމީ ކޮމިޝަނެއް އުފައްދަން ހަމާސްއިންވަނީ އދއަށް ގޮވާލާފައެވެ.

ފަލަސްތީނު ގައިދީންނަށް ކޮށްފައިވާ ބޮޑެތި އަނިޔާތަކާ ގުޅިގެން އދގެ ސެކްރެޓަރީ ޖެނެރަލްވެސް ވަނީ ކަންބޮޑުވުން ފާޅުކުރައްވާފައެވެ.