މާލެއިން ފުރައިގެން ކ. އެރިޔަދޫއަށް ދަތުރުކުރަމުން ދިޔަ ކޮޅުވެއްޓިއެއް ބަންޑުން ޖަހާލައި މަރުވި ގއ. ދާންދޫ، ސަރުސޫނުގެ، އަހްމަދު ޝިފާންގެ އާއިލާއަށް ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

“އަލްމާކް ފިޔަ” ކިޔާ ކޮޅުވެއްޓިއެއް ރޭ ދަންވަރު ބަންޑުން ޖަހާލި ހާދިސާގައި ގެއްލިގެން ހޯދަނިކޮށް ޝިފާންގެ އިތުރުން އިންޑިއާގެ ރައްޔިތަކު މަރުވެފައި އޮއްވާ ވަނީ ފެނިފައެވެ. އަދި އެ ކޮޅުވެއްޓިން ދަތުރުކުރި ބަންގްލަދޭޝްގެ ރައްޔިތަކު ވެސް ގެއްލިގެން އަންނަނީ ހޯދަމުންނެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ކޮޅުވެއްޓިއެއް ބަންޑުންޖެހުމުގެ ހިތާމަވެރި ޙާދިސާއެއް ރޭ ހިނގައި، އެ އުޅަނދުން ދަތުރުކުރި ބައެއް މީހުން ނިޔާވެފައި ވަނިކޮށް ފެނުނު ޚަބަރު އެމަނިކުފާނު އަޑުއެހީ ފުން ހިތާމައާއެކު ކަމަށެވެ.

“މަރްޙޫމަށް ﷲގެ ރުއްސެވުމާއި ފުއްސެވުމަށް އެދި ދުޢާކޮށް، އެ ޢާއިލާއަށް ކެތްތެރިކަން މިންވަރުކޮށް ދެއްވުން އެދެން،” ރައީސް ވިދާޅުވިއެވެ.

އަދި، މިހާތަނަށް ސަލާމަތްވި މީހުންނަށް ކުރިމަތިވި ޞިއްޙީ އަދި ނަފްސާނީ ދަތިތަކަށްވެސް އަވަހަށް ޝިފާ ލިބި، ޢާއްމު ޙާލަތަކަށް އައުމަށް އެދި އެމަނިކުފާނު ދުއާކުރެއްވިއެވެ.