އިދިކޮޅު އެމްޑީޕީން މާލޭގައި ރޭ ބޭއްވި މުޒާހަރާގައި ހުއްޓާ މީހަކަށް ޖެހުނު ހާޓް އެޓޭކަކީ ޕެޕާ ސްޕްރޭގެ ސަބަބުން ޖެހުނު ހާޓް އެެޓޭކެއް ނޫން ކަމަށް އައިޖީއެމްއެޗުން ބުނެފިއެވެ.
މިކަމާ ގުޅިގެން އައިޖީއެމްއެޗުން ނެރުނު ބަޔާނުގައި ބުނެފައިވަނީ، ހާޓް އެޓޭކެއް އާންމު ގޮތެއްގައި ޖެހެނީ ސިއްހީ ކޮންމެވެސް ސަބަބަކާ ހެދި ހިތުގެ ލޭ ހޮޅިތައް ނުވަތަ ލޭހޮޅިއެއް ބެދި، ހިތުން ބަޔަކަށް ލޭ ފޮނުވުމަށް އަންނަ ހުއްޓުމުން ކަމަށެވެ.
“ޕެޕާސްޕްރޭ ޖެހުމުން ވަގުތީ ގޮތުން ނޭވާލަން އުނދަގޫވެ، ކެއްސުން ފަދަ ސްޓްރެސް ރެސްޕޮންސްތައް އާދެވިދާނެ ނަމަވެސް، ޕެޕާ ސްޕްރޭއަކީ ސީދާ އޭގެ ޒާތުން ހާޓްއެޓޭކެއް ޖެހޭ ފަދަ އެއްޗެއް ނޫން،” އައިޖީއެމްއެޗްގެ ބަޔާނުގައިވެ އެވެ.
އައިޖީއެމްއެޗުން ބުނީ މިފަދަ ހާލަތްތައް އާންމުކޮށް ދިމާވަނީ ބަލިމީހާގެ ހުންނަ ސިއްހީ އެހެން މައްސަލަތަކެއްގެ ސަބަބުން ކަމަށެވެ.
ހާޓްއެޓޭކެއް ޖެހިގެން ފަރުވާދެނީ އެމްޑީޕީގެ ހުޅުމާލެ މެދު ދާއިރާގެ ނައިބު ރައީސް މުހައްމަދު ރަސްލާނަށެވެ. އޭނާގެ ހާލު ރަނގަޅުވެ، ސީސީޔޫއަށް ބަދަލުކޮށްފައިވާ ކަމަށް އައިޖީއެމްއެޗުން ބުންޏެވެ.
ކިޔުންތެރިންގެ ހިޔާލު