ލ. ކައްދޫގައި މި އަހަރުގެ އޮގަސްޓު މަހު ހިނގި ސައިކަލު އެކްސިޑެންޓެއްގައި އަންހެނަކު މަރުވި މައްސަލައިގެ ތަހުގީގު ނިންމައި، ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.

މި މައްސަލައިގައި ދައުވާކުރުމަށް ހުށަހަޅާފައިވަނީ ލ. ފޮނަދޫ / ހޯރަވިލާ، މުޙައްމަދު ނައުސާން (37 އަހަރު) ގެ މައްޗަށެވެ.

އޭނާއަކީ އެއްގަމު އުޅަނދު ދުއްވުމުގެ ލައިސަންސް ނެތި، އަދި ޓްރެފިކް ގަވާއިދާ ޚިލާފުވެގެން އެކި ފަހަރު މަތިން ޖޫރިމަނާކޮށްފައިވާ މީހެކެވެ.އެކްސިޑެންޓް ހިނގާފައިވަނީ އޮގަސްޓު 15 ވަނަ ދުވަހު ކައްދޫގެ ކަފިހިހުރަސް މަތިން މަގު ހުރަސްކުރަމުންދިޔަ ދެ މީހެއްގެ ގައިގައި ބާރު ސްޕީޑުގައި ދުއްވަމުން ދިޔަ ސައިކަލެއް ޖެހުމުންނެވެ.

މި ހާދިސާގައި އަނިޔާވި 64 އަހަރުގެ އަންހެނަކު ލ. ގަން ރީޖަނަލް ހޮސްޕިޓަލުގައި ފަރުވާ ދެމުންދަނިކޮށް ވަނީ ނިޔާވެފައެވެ.މި މައްސަލައާ ގުޅިގެން އޮގަސްޓު 16 ވަނަ ދުވަހު މުޙައްމަދު ނައުސާން ހައްޔަރުކޮށް، ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.

މި މައްސަލައިގެ ތަހުގީގު ނިންމައި ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ ސެޕްޓެންބަރު 25 ވަނަ ދުވަހުއެވެ. އަދި އެ އޮފީހުން މައްސަލަ ބަލައިގަނެފައިވަނީ ސެޕްޓެންބަރު 28 ވަނަ ދުވަހުއެވެ.