ފެނަކަ ކޯޕަރޭޝަންގެ ޚިޔާނާތުގެ މައްސަލައިގެ ތަޙުގީގު އަވަސްކުރުމަށް ކަމާބެހޭ އިދާރާތަކަށް އަންގާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ތ. ތިމަރަފުށީ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ފެނަކައިގެ މައްސަލައިގައި އެތައް ސަތޭކަ މިލިއަން ރުފިޔާގެ ވައްކަން ހިންގާފައިވާކަމަށް ތުހުމަތުކުރެވޭ ކަމަށާއި، މި މައްސަލަ ފުލުހުންގެ އިދާރާއިން މިހާރު ވަނީ ތަޙުގީގުކުރަން ފަށާފައެވެ. އަދި އޭސީސީ އާއި ޕްރޮސެކިއުޓަރ ޖެނެރަލްގެ އޮފީހަށްވެސް މި މައްސަލަ އަވަހަށް ތަޙުގީގުކުރުމަށް އަންގާފައިވާ ކަމަށް ރައީސް ވިދާޅުވިއެވެ.
”ޑިޖިޓަލައިޒް މިކުރަނީ އެ ބޭނުމުގައި. ގަވަނެންސް ނިޒާމު މި ޑިޖިޓަލައިޒް ކުރަނީ ކޮރަޕްޝަން އިރެޑިކޭޓް ކުރަން ނައްތާލަން، މިއީ އަޅުގަނޑުމެން ކުރިއަށްއޮތްތަނުގައި ކޮރަޕްޝަން ނައްތާލުމަށް ކުރިއަށްގެންދާ އެންމެ ބޮޑު ބިޔަ މަޝްރޫޢު.“ ރައީސް ވިދާޅުވިއެވެ.
ސަރުކާރުން އެސެޓް ރިކަވަރީ ބިލެއް މަޖިލީހަށް ހުށަހެޅުމަށް ނިންމާފައިވާ ކަމަށާއި، މި ބިލުގެ މައިގަނޑު މަޤްޞަދަކީ އެމްއެމްޕީއާރުސީ އަދި ފެނަކަ ފަދަ ކުންފުނިތަކުން ކޮށްފައިވާ ޚިޔާނާތުގެ މައްސަލަތައް ބެލުން ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ ފެނަަކައިގެ ކޮރަޕްޝަން މައްސަލަތައް ތަހުގީގުކުރުމުގައި ސަރުކާރުގެ އެއްވެސް ނުފޫޒެއް ނޯންނާނެ ކަމުގެ ޔަގީންކަން އަރުވާ ކަމަށެވެ.
ކިޔުންތެރިންގެ ހިޔާލު