ތ. ތިމަރަފުށީ ހޮސްޕިޓަލްގެ އާ އިމާރާތް ބިނާކުރުމުގެ މަސައްކަތް މިއަދު ރަސްމީކޮށް ފަށައިފިއެވެ. މި މަޝްރޫޢުގެ އެއްބަސްވުމުގައި ހެލްތް މިނިސްޓަރު އަބްދުﷲ ނާޒިމް އާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިން ޑިރެކްޓަރު އިބްރާހިމް ނަޒީމް ސޮއިކުރެއްވުމާއެކު، އިމާރާތުގެ ބިންގާ އެޅުމުގެ ރަސްމިއްޔާތު ބޭއްވިފައިވަނީ ރައީސް ޑރ. މުހައްމަދު މުއިއްޒު ކޮޅުމަޑުލު އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

އިމާރާތުގެ ބިންގާ އަޅާފައިވަނީ ހެލްތް މިނިސްޓަރާއި އާރްޑީސީގެ މެނޭޖިން ޑިރެކްޓަރުގެ އިތުރުން ތިމަރަފުށީ ދާއިރާގެ މެންބަރާއި ތިމަރަފުށީ ކައުންސިލްގެ ރައީސެވެ. މިއީ ސަރުކާރުން ރަށްރަށުގެ ސިއްހީ ޚިދުމަތް ފުޅާކޮށް ތަރައްގީކުރުމަށް ކުރިއަށް ގެންދަވާ މުހިންމު މަސައްކަތްތަކުގެ ތެރެއިން ފާހަގަކޮށްލެވޭ މަޝްރޫޢެކެވެ.

އާރްޑީސީގެ މެނޭޖިން ޑިރެކްޓަރު އިބްރާހިމް ނަޒީމް ޕީއެސްއެމްއަށް ދެއްވި މަޢުލޫމާތުގައި ފާހަގަކުރެއްވި ގޮތުގައި، މި އާ އިމާރާތުގައި 30 އެނދު ގާއިމުކުރެވޭނެއެވެ. އެ ފަރާތުން ވިދާޅުވީ މަޝްރޫޢުގެ މަސައްކަތް އެންމެ ބާރު ސްޕީޑުގައި ނިންމުމަށް އަމާޒުހިފައިވާ ކަމަށާއި، މި ހޮސްޕިޓަލް ތަރައްގީވުމުން ތިމަރަފުށީގެ ރައްޔިތުންނަށް ސިއްހީ ޚިދުމަތް ހޯދުމުގައި ގިނަގުނަ ލުއިފަސޭހަތަކެއް ލިބިގެންދާނެ ކަމަށެވެ.

ސަރުކާރުން ފާހަގަކުރައްވާ ގޮތުގައި، މި އާ އިމާރާތް ގާއިމުވުމުން ތިމަރަފުށީގެ ރައްޔިތުންނަށް ލިބެމުންދާ ސިއްހީ ޚިދުމަތްތަކުގެ ފެންވަރު މިހާރަށްވުރެ ބޮޑަށް ރަނގަޅުވެ، އިތުރު ފަސޭހަތަކާއި އާ ޚިދުމަތްތަކެއް ލިބިގެންދާނެއެވެ. މި މަޝްރޫޢަކީ ސަރުކާރުގެ ސިޔާސަތުގެ ދަށުން ރާއްޖޭގެ އެކި ކަންކޮޅުތަކުގައި ސިއްހީ ޚިދުމަތްދޭ ތަންތަން އިތުރަށް ތަރައްގީކޮށް، ޒަމާނީ ޚިދުމަތްތައް ތަޢާރަފުކުރުމަށް ކުރިއަށް ގެންދަވާ ބޮޑު ޕްރޮގްރާމުގެ ބައެކެވެ.