ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި ފެނަކަ ކޯޕަރޭޝަނުން ހިންގާފައިވާ ބޮޑު މާލީ އަނިޔާ އޮޑިޓަރ ޖެނެރަލްގެ އޮފީހުން ރޭ ނެރުއްވި އެ ކުންފުނީގެ އޮޑިޓް ރިޕޯޓުން ހާމަވެއްޖެއެވެ.

އޮޑިޓަރ ޖެނެރަލްގެ އޮފީހުން ރޭ ވަނީ ފެނަކަ ކޯޕަރޭޝަންގެ ޚާއްޞަ އޮޑިޓް ރިޕޯޓެއް ޢާންމުކޮށްފައެވެ. 104 ޞަފްޙާގެ މި ރިޕޯޓަކީ އެ ކުންފުނިން މުދަލާއި ޚިދުމަތް ހޯދުމާއި، ކުންފުނީގެ މާލީ ޙާލަތާއި ހިސާބުތައް ބެލެހެއްޓުމާ ގުޅޭގޮތުން އޮޑިޓްކޮށް ޢާންމުކޮށްފައިވާ ރިޕޯޓެކެވެ.

އެމްޑީޕީގެ ދެވަނަ ވެރިކަމުގައި – ކުރީގެ ރައީސް ޞާލިޙްގެ ސަރުކާރުގައި އެންމެ ބޮޑު މާލީ އަނިޔާ ހިންގި ކަމަށް ކުރީން ވެސް ބެލެވިފައި އޮތީ ފެނަކައިންނެވެ. އޮޑިޓް ރިޕޯޓުން އެނގޭ ގޮތުގައި މިއީ ދައުލަތުގެ ކުންފުންޏަކުން މިހާތަނަށް ހިންގާފައިވާ އެންމެ ބޮޑު މާލީ އަނިޔާއެވެ. މި މާލީ އަނިޔާ އެމްއެމްޕީއާރުސީއާއި އެފްޕީއައިޑީގެ މާލީ އަނިޔާއަށް ވުރެ ވެސް ބޮޑެވެ.

ބީލަމުގެ އުސޫލުން ބޭރުން 2.2 ބިލިއަން ރުފިޔާ
އޮޑިޓަރ ޖެނެރަލްގެ ރިޕޯޓުގައިވާ ގޮތުން ވާދަވެރި ބީލަމުގެ އުސޫލުން ބޭރުން 2,239,640,958 (ދެ ބިލިއަން ދުއިސައްތަ ތިރީސް ނުވަ މިލިއަން ހަ ލައްކަ ސާޅީސް ހާސް ނުވަސަތޭކަ ފަންސާސް އަށެއް) ރުފިޔާގެ މަސައްކަތް އެކި ފަރާތްތަކާ ވަނީ ޙަވާލުކޮށްފައެވެ.

މިއީ ޞާލިޙްގެ ވެރިކަމުގައި 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ކުރެވުނު ކަމެކެވެ. މިގޮތުން ޖުމްލަ 674 އެއްބަސްވުމެއް ބީލަމުގެ އުސޫލުން ބޭރުން ހަދާފައިވެއެވެ.

އޮޑިޓް ރިޕޯޓުގައިވާ ގޮތުން މި އެއްބަސްވުންތަކުގެ ތެރެއިން ވަރަށް ބޮޑު އިންސައްތައެއްގެ އެއްބަސްވުންތައް ހަދާފައި ވަނީ ޢާންމު އުސޫލުން ބޭރުން މުދަލާއި ޚިދުމަތް ފޯރުކޮށްދިނުމަށް ޝައުޤުވެރިވާ ފަރާތްތައް ހޯދުމަށް ޢާންމުކޮށް އިޢުލާނު ކުރުމެއް ނެތި މައިގަނޑު ގޮތެއްގައި ދެތިން ފަރާތަކުން އަގު ހޯދައިގެންނެވެ.

އަދި އެކަން ކޮށްފައި ވަނީ ފެނަކަ ކޯޕަރޭޝަނުން ބޭނުން ގޮތަކަށް އެކަމަށް ޚާއްޞަ ކޮމިޓީން މަސައްކަތް ޙަވާލު ކުރާނެ ބަޔަކު ކުރީން ކަނޑައަޅާ ނިންމުމަށް ފަހު ކަމަށްވެސް ބުނެފައިވެއެވެ.

މާލީ އަނިޔާ ކުރުމަށް ޤަވާޢިދު ވެސް ބަދަލުކުރި
އޮޑިޓަރ ޖެނެރަލްގެ ރިޕޯޓުގައިވާ ގޮތުން ފެނަކަ ކޯޕަރޭޝަންގެ މުދަލާއި ޚިދުމަތް ހޯދުމުގައި ޢަމަލު ކުރާ ގަވާއިދުގައިވާ ގޮތުން ކުންފުންޏަށް ބޭނުންވާ މުދަލެއް ނުވަތަ ޚިދުމަތެއްގެ އަގު ގު ޖީއެސްޓީ ނުހިމަނާ 225,000 (ދެ ލައްކަ ފަންސަވީސް ހާސް) ރުފިޔާއަށް ވުރެ މަތިވާނަމަ ރާއްޖެއިން އެ މުދަލެއް ނުވަތަ ޚިދުމަތެއް ހޯދާނަމަ ހޯދަން ވާނީ ބީލަމުގެ އުސޫލުން ޢާންމުކޮށް އިޢުލާނުކޮށްގެން ކަމަށް ބަޔާންކޮށްފައިވެއެވެ.