މ. ދިއްގަރުގައި ހޮސްޕިޓަލް ގާއިމު ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ހަވާލުކޮށްފިއެވެ.

މި މަޝްރޫއު އެމްޓީސީސީއާއި ހަވާލުކޮށްފައިވަނީ ރައީސް މުއިއްޒު، ވ.، ފ.، މ.، އަދި ތ. އަތޮޅުގެ 25 ރަށަކަށް ކުރައްވަމުން ގެންދަވާ ދަތުރުފުޅުގެ ތެރެއިން މ. އަތޮޅުގެ ދިއްގަރަށް ވަޑައިގެން ބޭއްވި ހާއްސަ ރަސްމިއްޔާތެއްގައެވެ.

މި ރަސްމިއްޔާތުގައި ހެލްތް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ، ހެލްތް މިނިސްޓަރު، އަބްދުﷲ ނާޒިމް އިބްރާހިމެވެ. އެމްޓީސީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު، ޑީސީޕީ (ރިޓަޔާޑް) އަހުމަދު ސައުދީއެވެ.

މި ރަސްމިއްޔާތުގައި ރައީސްގެ އަރިހުގައި ދައުލަތުގެ ވަޒީރުންނާއި، މަޖިލީހުގެ ދިއްގަރު ދާއިރާގެ މެމްބަރު އަދި މަޖިލީހުގެ ނައިބު ރައީސް، އަހުމަދު ނާޒިމްގެ ވެސް ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ރައީސް ވިދާޅުވީ، އެރަށުގައި ހޮސްޕިޓަލުގެ އިމާރާތް އެޅުމުގެ މަސައްކަތަކީ އެމަނިކުފާނުގެ ވައުދުފުޅެއް ކަމަށާއި، އެއީ އެމަނިކުފާނު ރިޔާސީ އިންތިހާބުގެ ކެމްޕޭނުގައި ވެވަޑައިގެންނެވި އެންމެ މުހިންމު އެއް ވައުދުފުޅު ކަމަށެވެ.

ރައީސް ވިދާޅުވީ، މި މަޝްރޫއުގެ ދަށުން 30 އެނދުގެ ހޮސްޕިޓަލެއް އެޅޭނެ ކަމަށެވެ. އަދި ހޮސްޕިޓަލުގައި ހުރިހާ ކަމެއް ފުރިހަމަވެގެން ދާނެ ކަަމަށާއި، ސިއްހީ ހިދުމަތް ދިނުމުގެ ނިޒާމް ވަރުގަދަވެގެން ދާނެ ކަމަށެވެ.

“އިރާދަކުރެއްވިއްޔާ ވަރަށް އިސްކަމެއް ދީގެން، ވަރަށް ގާތުން ސަރުކާރުގެ ކަމާއި ބެހޭ ވުޒާރާއިންނާއި ކުންފުނިން މިކަމުގައި ވަރަށް އަވަހަށް މަސައްކަތްތައް ކުރިއަށް ގެންދާނެ،”. ރައީސް ވިދާޅުވިއެވެ.