ފުލުހުން ފެނިގެން މަގުމައްޗަށް އުކާލި ޕެކެޓުތަކެއްގައި މަސްތުވާތަކެތި ހުރުމުން ޒުވާނަކު ހައްޔަރުކޮށްފިއެވެ.

ފުލުހުން ހާމަކޮށްފައިވާގޮތުގައި މި މައްސަލައާ ގުޅިގެން ހައްޔަރުކޮށްފައިވަނީ، ތ. ތިމަރަފުށި / މާޖެހިގެ، މާދިން މުޙައްމަދު ނަޞީރު (19އ) އެވެ. މާދިން ހައްޔަރުކޮށްފައިވަނީ، ހުޅުމާލެ ފޭސް 1 ގެ ފުލުހުން ރަށުތެރެ ޕެޓްރޯލްކުރަމުން ދިޔައިރު ކަންނެލި ޖެޓީ ސަރަޙައްދުން ހުއްޓުވައި ބަލައިފާސްކޮށްފައެވެ.

ފުލުހުން ބުނީ، އެ ސަރަހައްދުން ދިޔަ ސައިކަލެއްގެ ފަހަތުގައި އިން މާދިން އަށް ފުލުހުން ފެނުމުން، އޭނާގެ އަތުގައި އޮތް އެއްޗެއް އެއްލައިލާފައިވާކަމަށެވެ. އެހެންކަމުން، ފުލުހުން އެ ތަކެތި ނަގައި ބަލައިފާސްކުރިއިރު މަސްތުވާތަކެތިކަމަށް ބެލެވޭ އެއްޗެއްހުރި ފަސް ރަބަރު ޕެކެޓު ފެނިފައިވާކަމަށްވެސް ފުލުހުން ބުންޏެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ޙާޒިރުކުރުމުން 10 ދުވަހަށް ބަންދުގައި ބެހެއްޓުމަށް ޢަމުރުކޮށްފައިވެއެވެ.

މި މައްސަލަ ފުލުހުން އަންނަނީ ތަހުގީގު ކުރަމުންނެވެ.