ސިވިލް ސާވިސް ކޮމިޝަންގެ ރައީސްކަމުގެ މަގާމަށް މއ. ސިގްމާ/ މުހައްމަދު މުޖުތާޒް، ނައިބު ރައީސްކަމުގެ މަގާމަށް އެ ކޮމިޝަންގެ މެންބަރު މުހައްމަދު ނާސިހު އައްޔަން ކުރުމަށް ރައްޔިތުންގެ މަޖިލީހަށް ފޮނުވައިފިއެވެ.

މީގެ އިތުރުން ހިއުމަންރައިޓްސް ކޮމިޝަން (އެޗްއާރުސީއެމް)ގެ ނައިބު ރައީސްކަމުގެ މަގާމަށް އެ ކޮމިޝަންގެ މެންބަރު މ. ޕޮޕީ، މުހައްމަދު ޝަފީގު އައްޔަން ކުރުމަށްވެސް ވަނީ ފޮނުވައިފައެވެ.

އެ ބޭފުޅުން އެމަގާމުތަކަށް އައްޔަން ކުރެއްވުމަށްޓަކައި، ރައީސުލްޖުމްހޫރިއްޔާ މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ސިޓީފުޅު މަޖިލީހުގެ މިއަދުގެ ޖަލްސާގައި އިއްވުމަށްފަހު، އެ މައްސަލަ ދިރާސާ ކުރުމަށް ވަނީ ކަމާބެހޭ ކޮމިޓީތަކަށް ފޮނުވައިފައެވެ.

އެގޮތުން ސީއެސްސީއަށް ރައީސް އާއި ނާއިބު ރައީސް އައްޔަންކުރުމަށް ފޮނުވި މައްސަލަ ވަނީ މިނިވަން މުއައްސަސާތަކުގެ ކޮމިޓީއަށް ފޮނުވައިފައެވެ. އެޗްއާރުސީއެމްގެ ނައިބު ރައީސްކަަމަށް ބޭފުޅަކު އައްޔަން ކުރުމުގެ މައްސަލަ ދިރާސާ ކުރުމަށް، ފޮނުވީ މަޖިލީހުގެ ހިއުމަންރައިޓްސް އެންޑް ޖެންޑާ ކޮމިޓީއަށެވެ.

އެ މައްސަލަތައް ކޮމިޓީތަކުން ދިރާސާކުރުމަށްފަހު، މަޖިލިސް ތަޅުމަށް ފޮނުވުމުން އެބޭފުޅުނަށް މަޖިލީހުގެ ރުހުން ދިނުމާބެހޭގޮތުން ވޯޓަށް އަހާނެއެވެ.