ގެދޮރުވެރިޔާ ސްކީމްގެ ދަށުން އިމާރާތްކޮށްފައިވާ 4،000 ފްލެޓު ހަވާލުކުރުމުގެ މަސައްކަތް ފެށުމަށްޓަކައި، ސެކިއުރިޓީ ޑިޕޮސިޓް ދެއްކުމުގެ ފުރުސަތު ފަހި ދިރިއުޅުން ކޯޕަރޭޝަނުން މިއަދު ހުޅުވާލައިފިއެވެ.

އެ ކުންފުނިން މިއަދު ވަނީ ފްލެޓްގެ އެއްބަސްވުމުގައި ސޮއިކުރި މީހުންނަށް ސެކިޔުރީޓީ ޑިޕޮސިޓް ފައިސާ ދައްކަން އެސްއެމްއެސް މެދުވެރިކޮށް އަންގަން ފަށާފައެވެ.

މިހާތަނަށް ގާތްގަނޑަކަށް 3،000 މީހަކާއެކު އެއްބަސްވުމުގައި ސޮއިކޮށް ވަނީ ނިމިފައެވެ.

އިންޑިއާގެ ދެ ކުންފުންޏަކާ ހަވާލުކޮށްގެން ކުރިއަށްގެންދާ މި މަޝްރޫއުގައި ދެ ކޮޓަރީގެ އެޕާޓްމަންޓުތަކުގެ ކުލީގެ ގޮތުގައި ކަނޑައަޅާފައިވަނީ 7،000 ރުފިޔާއެވެ. މީގެ އިތުރުން މެއިންޓެނަންސް ފީގެ ގޮތުގައި 1،000 ރުފިޔާ އަދި ސެކިއުރިޓީ ޑިޕޮސިޓުގެ ގޮތުގައި 15،000 ރުފިޔާ ދައްކަން ޖެހެއެވެ.

ތިން ކޮޓަރީގެ ފްލެޓްތަކުގެ ކުލީގެ ގޮތުގައި 9،500 ރުފިޔާ، މެއިންޓެނަންސް ފީގެ ގޮތުގައި 1،500 ރުފިޔާ އަދި ސެކިއުރިޓީ ޑިޕޮސިޓުގެ ގޮތުގައި 25،000 ރުފިޔާ ދައްކަންޖެހެއެވެ.

ފްލެޓުގެ އެއްބަސްވުމުގައި ސޮއިކުރާ ފަރާތްތަކަށް ފެން، ކަރަންޓް، ގޭސް އަދި ކޭބަލް ފަދަ އަސާސީ ހުރިހާ ޚިދުމަތްތަކަށް އެ ކުންފުނިން ރަޖިސްޓްރީކޮށްދޭނެއެވެ.