ގައުމީ އެއާލައިން، މޯލްޑިވިއަނުން ޑޮމެސްޓިކް ބައެއް ރޫޓްތަކުގައި “ސްނެކް އެންޑް ފްލައި” ގެ ނަމުގައި އާ އޮންބޯޑް ރީޓެއިލް ހިދުމަތެއް ތައާރަފުކޮށްފިއެވެ.

މޯލްޑިވިއަންގެ “ސްނެކް އެންޑް ފްލައި” ގެ ދަށުން ދަތުރުވެރިންނަށް ލުއިކާނާ އާއި، ބުއިންތަކާއި އަދި ރާއްޖޭގެ ސުވެނިއާ ގަންނަން ލިބޭނެއެވެ.

މޯލްޑިވިއަނުން ބުނީ އެ ހިދުމަތުގެ ދަށުން ދަތުރުވެރިންނަށް މިހާރު ކެބިން ކްރޫއިން މެދުވެރިކޮށް ސީދާ ލުއި ކެއުމާއި ބުއިންތައް ގަނެވޭނެ ކަމަށާއި ހާއްސަކޮށް ބޭރުގެ ފަތުރުވެރިންނަށް ރާއްޖޭގެ ސަގާފަތާއި ސަގާފަތް ދައްކުވައިދޭ ސުވެނިއާސް ގަތުމުގެ ފުރުސަތު ވެސް ލިބިގެންދާނެ ކަމަށެވެ. އަދި ދަތުރުވެރިންގެ ހިޔާލާއި ތަޖުރިބާގެ އަލީގައި އެ ހިދުމަތުގެ ދަށުން ވިއްކާ ތަކެތި އިތުރުކުރާނެ ކަމަށް ވެސް މޯލްޑިވިއަނުން ބުންޏެވެ.

އެ ހިދުމަތް ތައާރަފުކުރުމަކީ މޯލްޑިވިއަނުން ދޭ ހިދުމަތްތައް އިތުރަށް ފުޅާކުރުމަށް ކުރަމުންދާ މަސައްކަތުގެ ތެރޭގައި ހިމެނޭ ކަމެކެވެ.