އިސްރާއީލުން ބުރާސްފަތި ދުވަހު ޔަމަނުގެ ވެރިރަށް ސަންޢާއަށް ދިން ވައިގެ ހަމަލާތަކުގައި ހޫޘީ ސަރުކާރުގެ ބޮޑުވަޒީރު އަހްމަދު ޣާލިބް އައް-ރަހަވީއާއި، ކެބިނެޓުގެ ބައެއް ވަޒީރުން އަވަހާރަވެފައިވާކަން ހޫޘީން ކަށަވަރު ކޮށްދީފިއެވެ.

ބޮޑުވަޒީރު އަވަހާރަވީ، އާންމުކޮށް ބާއްވާ ކެބިނެޓް ބައްދަލުވުން ހިނގަމުންދިޔަ ތަނަށް އިސްރާއީލުން ވައިގެ ހަމަލާ ދިނުމުގެ ސަބަބުން ކަމަށް، ހޫޘީ ސަރުކާރުން ބުނެފައި ވެއެވެ. އަދި މި ހަމަލާގައި ކެބިނެޓުގެ ވަޒީރުންތަކެއް އަވަހާރަވެފައިވާ ކަމަށްވެސް ބުނެފައި ވެއެވެ.

އިސްރާއީލު މީޑިއާއިން ހުކުރު ދުވަހު ބުނެފައިވަނީ، ސިފައިން ދިން ހަމަލާތަކުގައި ބޮޑުވަޒީރާއި، ކެބިނެޓުގެ ހުރިހާ މެމްބަރުން އަވަހާރަކޮށްލެވުނު ކަމަށެވެ. އެއީ 12 ވަޒީރުންނެވެ.

ނަމަވެސް، ހޫޘީންގެ ސަރުކާރުން އަދަދުތަކެއް ނުބުނެއެވެ.

ހޫޘީން ދިން ޑްރޯން ހަމަލާތަކުގެ ރައްދުގައި އިސްރާއީލުން ޔަމަނުގެ ވެރިރަށް ސަންޢާއަށް ދިން ވަރުގަދަ  ހަމަލާތައް އަމާޒުކުރީ، ހޫޘީންގެ ސަރުކާރުގެ އިންޓިރިއަރ މިނިސްޓްރީ އިމާރާތަށާއި، ހޫޘީން ސިފައިންގެ ތަމްރީނު ކޭމްޕަކަށް ކަމަށް މީޑިއާއިން ކުރިން ރިޕޯޓް ކޮށްފައި ވެއެވެ.

ބައެއް ރިޕޯޓްތައް ބުނީ، އިސްރާއީލުން ހަމަލާދިނީ، ހޫޘީންގެ ލީޑަރު އަބްދުލް މާލިކް އަލްހޫޘީއާއި، ޗީފް އޮފް ސްޓާފާއި، އަސްކަރީ ވެރިންގެ ބައްދަލުވުމެއް ހިނގަމުންދިޔަ ތަނަކަށް ކަމަށެވެ.

ހޫޘީންގެ ލީޑަރު އަބްދުލް މާލިކް އަލްހޫޘީއާ ގުޅޭގޮތުން ސަރުކާރުން އެއްވެސް އެއްޗެއް ނުބުނެއެވެ.

ބޮޑުވަޒީރު އަހްމަދު ޣާލިބް އައް-ރަހަވީއާއި، ކެބިނެޓް ވަޒީރުންތަކެއް އަވަހާރަ ކޮށްލި ނަމަވެސް، އެކަން ވެގެންދާނީ މިހާރުވެސް ހޫޘީން ތިބި މަގުގައި ދެމިތިބުމަށް އިތުރު ހިވްތަރެއް ލިބިގެންދާނޭ ކަމެއް ކަމަށް، ޙޫޘީންގެ ސަރުކާރުން ނެރުނު ބަޔާނުގައި ބުނެފައި ވެއެވެ.

ޣައްޒާ ރައްޔިތުންގެ ހައްގުގައި ހޫޘީން ހިންގަމުންގެންދާ އަސްކަރީ އޮޕަރޭޝަންތަކަށް އެއްވެސް ހުއްޓުމެއް ނާންނާނެ ކަމުގެ ޔަގީންކަން، ޔަމަނުގެ ރައްޔިތުންނާއި، ފަލަސްތީނު ރައްޔިތުންނަށާއި، އަދި ހޫޘީންގެ އޮޕަރޭޝަނަށް ތާއީދުކުރާ ދުނިޔޭގެ އެންމެނަށް ހޫޘީ ސަރުކާރުން ދީފައި ވެއެވެ.