އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްއިން ފުރަތަމަ ފަހަރަށް ދިވެހި ކުންފުނިތަކުގެ ޗީފް ފައިނެންޝަލް އޮފިސަރުންނަށް އަމާޒުކޮށް ޚާއްސަ ފޯރަމެއް ބާއްވައިފިއެވެ.

މިއީ ރާއްޖޭގެ މާލީ ދާއިރާއާ ބެހޭގޮތުން މަޝްވަރާކޮށް، ދާއިރާގެ ކުރިއެރުމަށް ކުރެވޭނެ ކަންކަމާ ގުޅޭގޮތުން ތަޖުރިބާ ބަދަލުކުރުމަށް ބޭއްވޭ ފޯރަމެކެވެ.

ސީއޭ މޯލްޑިވްސްގެ ސީއެފްއޯ ފޯރަމް ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކެބިނެޓް އެފެއާޒް އަޙްމަދު ޢަލީ ޙަބީބް ވިދާޅުވީ ރާއްޖޭގެ މާލީ ދާއިރާ ކުރިއެރުވޭނީ އިސްނަގާ، ނަޒާހަތްތެރި އަދި އީޖާދީ ވިސްނުން ގެންގުޅޭ ބަޔަކު ދާއިރާގައި މަސައްކަތްކޮށްގެން ކަމަށެވެ. އަދި މިފަދަ މާލީ ވެށްޓެއް ޤާއިމުކުރުމަށްޓަކައި ސަރުކާރުގެ ފުރިހަމަ އެއްބާރުލުން ސީއޭ މޯލްޑިވްސްއަށް ލިބޭނެކަމަށް ޢަލީ ޙަބީބް ވިދާޅުވިއެވެ.

އަޙްމަދު ޢަލީ ޙަބީބް ވިދާޅުވީ މާލީ ދާއިރާއާއި ނަޒާހަތްތެރިކަމާއެކު ރަނގަޅަށް އެކުލަވާލެވޭ އޮޑިޓުތަކުގެ ސަބަބުން ގިނަ ފައިދާތަކެއް ޤައުމަށްކުރާ ކަމަށެވެ. އެ ގޮތުން އެންމެ އެކަށޭނަ ފަރާތަށް ބޭންކުތަކަށް ލޯން ދޫކުރެވުމާއި އެންމެ އެކަށޭނަ ގޮތަށް ޓެކްސް ނެގުމާއި ބާރު ހިފޭ ރިޕޯޓުތަކުގެ ސަބަބުން އިންވެސްޓަރުންގެ ޝައުޤުވެރިކަންވެސް ރާއްޖެއަށް އިތުރުވެގެންދާނެކަމަށް ޢަލީ ޙަބީބް ވިދާޅުވިއެވެ.

“ސަރުކާރުން އޮތީ ރާއްޖޭގެ މާލީ ދާއިރާ ކުރިއެރުވުމަށާއި މިކަމަށް ދޭންޖެހޭ އެއްބާރުލުން ދިނުމަށް ތައްޔާރަށް. މި ފޯރަމްގެ ސަބަބުންވެސް ދާއިރާގެ ތަޖުރިބާ ހިއްސާކޮށް، ރާއްޖޭގެ ސީއެފްއޯއިންނަށް ގިނަ ކަންތައްތަކެއް ދަސްކުރުމަށް މަގުފަހިވެގެންދާނެ.” ޢަލީ ޙަބީބް

ފޯރަމްއާ ގުޅޭގޮތުން ސީއޭ މޯލްޑިވްސްގެ ރައީސް މުޙައްމަދު ޙަލީމް ޢަބްދުﷲ ވިދާޅުވީ ފޯރަމްގެ ބޭނުމަކީ މާލީ ދާއިރާގެ ބޭފުޅުން އެއް ތަނަކަށްވެ ތަޖުރިބާ ޙިއްސާކޮށް، މަޢުލޫމާތު ބަދަލުކުރުން ކަމަށެވެ. އަދި މި ފޯރަމްގައި ޓެކްނޮލޮޖީގެ އައު އީޖާދުތަކުގެ އެހީގައި ދާއިރާ ކުރިއެރުވޭނެ ގޮތްތަކާއި ދުނިޔެއަށް އެކިއެކި ބަދަލުތަކަށް އަހުލުވެރިވާންޖެހޭ މުހިންމު ކަންކަމަށް އަލިއަޅުވާލެވޭނެކަމަށް ސީއޭ މޯލްޑިވްސްގެ ރައީސް ވިދާޅުވިއެވެ.

“ދާއިރާގެ ތަޖުރިބާކާރުން އެކި ސެޝަންތައް ނަންގަވައިދެއްވާނެ. މި ސެޝަންތަކުން ދާއިރާ ކުރިއެރުވޭނެ ގޮތްތަކާއި ބަދަލުވަމުންދާ ދުނިޔޭގައި ސީއެފްއޯއިންގެ ދައުރާމެދު ހޭލުންތެރިވުމަށް މަގުފަހިވާނެ.” މުޙައްމަދު ޙަލީމް ޢަބްދުﷲ ވިދާޅުވިއެވެ.

ސީއެފްއޯ ފޯރަމް 2025އަކީ ސީއޭ މޯލްޑިވްސްއިން މިގޮތަށް އިސްނަގައިގެން ބާއްވާ ފުރަތަމަ ފޯރަމެވެ. މި ފޯރަމްގައި ރާއްޖޭގައި ހިންގާ ކުންފުނިތަކުގެ ޗީފް ފައިނެންޝިއަލް އޮފިސަރުންނާއި ރާއްޖޭގެ މާލީ ދާއިރާގެ ތަޖުރިބާކާރުންނާއި ދާއިރާގައި މަސައްކަތްކުރާ ފަރާތްތައް ބައިވެރިވެއެވެ. މިގޮތުން 100 އަށްވުރެ ގިނަ މީހުން ފޯރަމްގައި ބައިވެރިވެއެވެ.

އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް، ސީއޭއަކީ ރާއްޖޭގެ އެކައުންޓަންސީ ޕްރޮފެޝަނާގުޅޭ ކަންކަން، ބައިނަލްއަޤްވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ރާއްޖޭގައި އެކައުންޓަންސީގެ ޕްރޮފެޝަނެއް ޤާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި އުފައްދާފައިވާ އިންސްޓިޓިއުޓެކެވެ. މި އިދާރާ އުފައްދާފައިވަނީ 2020 ވަނަ އަހަރު އެކުލަވާލި ދިވެހިރާއްޖޭގެ ޗާޓަރޑް އެކައުންޓެންޓުންގެ ޤާނޫނުގެ ދަށުންނެވެ.

ސީއޭ އިންސްޓިޓިއުޓް އެކުލެވިގެންވަނީ ގަވަރނިން ކައުންސިލެއްގެ ދަށުން ކޮމިޓީތަކެއްގެ މައްޗަށެވެ. އެގޮތުން ޖުމްލަ 9 ކޮމިޓީއެއް މި އިންސްޓިޓިއުޓުގައި އޮވެއެވެ. އަދި އެކައުންޓިން ދާއިރާގައި މަސައްކަތްކުރާ ޖުމްލަ 168 މެންބަރުން މި އިންސްޓިޓިއުޓްގައި ހިމެނެއެވެ.