މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަޒީފާގެ މަސައްކަތުގެ މައުލޫމާތު ދިނުމަށް ކެރިއާ ގައިޑެންސް ސެޝަނެއް ކުރިއަށް ގެންގޮސްފިއެވެ.

އެމްޕީއެލްއިން ވިދާޅުވީ މިނިސްޓްރީ އޮފް ޔޫތް އެމްޕަވާމެންޓް އިންފޮމޭޝަން އެންޑް އާޓްސްއާއި ގުޅިގެން ކުރިއަށް ގެންދާ ބަދަހި ޕްރޮގްރާމްގެ ދަށުން ކެރިއާ ގައިޑެންސް ސެޝަނެއް ކުރިއަށް ގެންގޮސްފައިވާ ކަމަށެވެ. އެ ސެޝަންގައި ވަޒީގެ ފުރުސަތުތަކާއި ވަޒީފާގެ މާހައުލުގެ މައުލޫމާތު ބައިވެރިންނަށް ހިއްސާކޮށްފައިވާނެ ކަމަށް ވެސް ވިދާޅުވިއެވެ.

އަދި މާލޭ ކޮމާޝަލް ހާބަރުގެ މައުލޫމާތާއި ބައިނަލްއަގްވާމީ ފެންވަރުގައި ކުރަމުންދާ މަސައްކަތްތައް ވެސް އެ ސެޝަންގައި ހިއްސާކޮށްފައިވާނެ ކަމަށް އެމްއޭސީއެލްއިން ވިދާޅުވެއެވެ.

އެ ސެޝަންގެ ބައިވެރިންނަށް އެމްއޭސީއެލްގެ މަސައްކަތަކާއި ޑިޕާޓްމެންޓްތަކުން ކުރިއަށް ގެންދާ ވަކިވަކި ހާއްސަ މަސައްކަތްތައް ސާފުވެގެން ދިޔަ ކަަމަށް ވެސް ވިދާޅުވިއެވެ. އަދި އެ ކުންފުނީގައި ހުރި ފުރުސަތުތައް އެނގިގެންދިޔަ ކަމަށެވެ.

އެމްޕީއެލްއިން ވިދާޅުވީ ކެރިއާ ސެޝަންގެ މަގުސަދަކީ ބައިވެރިންނަށް ވަޒީފާގެ މާހައުލުގެ މައުލޫމާތު ފޯރުކޮށްދީ އެ މީހުން އެމްޕަވާކުރުން ކަމަށެވެ. އަދި އެ މީހުންނަށް ހުރި ފުރުސަތުތައް އަމިއްލައަށް ދެނެގަތުމަށް މަގުފަހިކޮށްދިނުން ކަމަށެވެ.