އިސްތިއުމާރީ އިސްރާއީލުން ޣައްޒާގެ ދެކުނުގައި ހުންނަ ނަސަރް ހޮސްޕިޓަލަށް ވަރުގަދައަށް ބޮންއެޅުމުގެ ސަބަބުން 14 މީހުން ޝަހީދުވެފައިވާ ކަމަށް، ޣައްޒާ މީޑިއާ އޮފީހުން ބުނެފިއެވެ.
ޣައްޒާ މީޑިއާ އޮފީހުން ނެރުނު ބަޔާނެއްގައި ބުނެފައިވަނީ، ބޮން އެޅުމުގެ ސަބަބުން 14 މީހުން ޝަހީދުވެ އިތުރު އެތައް ބަޔަކު ޒަޚަމްވި ކަމަށެވެ.
ޝަހީދުވެފައިވާ މީހުންގެ ތެރޭގައި 4 ނޫސްވެރިންވެސް ހިމެނޭ ކަމަށް ބުނެފައި ވެއެވެ.
ނަސަރް ހޮސްޕިޓަލަކީ ޣައްޒާގެ ދެކުނުގެ ޚާން ޔޫނިސްގައި ހުންނަ ހޮސްޕިޓަލެކެވެ. އެ ހޮސްޕިޓަލަށް އިސްތިއުމާރީ ޓެރަރިސްޓުން ދެފަހަރަށް މިއަދު ވައިގެ ހަމަލާތައް ދީފައިވާ ކަމަށް ޣައްޒާ މީޑިއާ އޮފީހުން ބުނެފައި ވެއެވެ.
އިސްތިއުމާރީ ޓެރަރިސްޓުން ޑްރޯން ބޭނުންކޮށްގެން ފުރަތަމަ ހަމަލާދިނީ ހޮސްޕިޓަލުގެ ފުރާޅުމައްޗަށެވެ. އެތަނަށް ދިން ހަމަލާގައި ޝަހީދުވި ނޫސްވެރިއެއްގެ ހަށިގަނޑު ނެގުމަށް ސިވިލް ޑިފެންސް ޓީމުތަކާއި، އަދި އެ މަންޒަރުތައް ކަވަރކުރަން ނޫސްވެރިން ދިޔަ ވަގުތު ޓެރަރިސްޓު މަތިންދާ ބޯޓުތަކުން ދެވަނަ ފަހަރަށް އައިސް ބޮންއެޅީއެވެ. އަދި ހަމަ އެތަނަށް ދެވަނަ ފަހަރަށްވެސް ބޮންއަޅާފައި ވެއެވެ.
އިސްތިއުމާރީ ޓެރަރިސްޓުންގެ ހަމަލާތަކުގައި ޝަހީދުވި މީހުންގެ ތެރޭގައި ސިވިލް ޑިފެންސް ޓީމުގެ މެމްބަރުންވެސް ހިމެނެއެވެ.
ނަސަރް ހޮސްޕިޓަލަށް ދިން ހަމަލާގެ އިތުރުން، ޓެރަރިސްޓުން މިހާރުވެސް ގެންދަނީ ޣައްޒާގެ އެކި ހިސާބުތަކަށް ވަރުގަދަ ހަމަލާތަކެއް ދެމުންނެވެ. މި ހަމަލާތަކުގައި މިއަދުގެ މިހާތަނަށް 19 މީހުން ޝަހީދުކޮށްލާފައި ވާއިރު، އޭގެ ތެރޭގައި އިންސާނީ އެހީ ހޯދަން ގޮސް ތިއްބައި ބަޑިޖަހައި ޝަހީދުކޮށްލި މީހުންވެސް ހިމެނެއެވެ.
އަނެއްކޮޅުން، ޣައްޒާގައި ވެރިކަންކުރާ ގާޒާ ސިޓީ ހިފުމުގެ ޕްލޭންގެ ދަށުން، ގާޒާ ސިޓީގެ ޒައިތޫން އަވަށާއި، ސަބްރާއަށްވެސް ވަރުގަދަ ވައިގެ ހަމަލާތަކެއް ދެމުން އެބަ ގެންދެއެވެ. އަދި ގާޒާ ސިޓީގެ އާންމުން ރަށުން ބޭރުކޮށް ފައްސާލުމުގެ މަސައްކަތްވެސް ކުރަމުން އެބަ ގެންދެއެވެ.
ކިޔުންތެރިންގެ ހިޔާލު