ގައުމީ ދުވަހުގެ މުނާސަބަތުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މުވައްޒަފުން ގައުމީ ހެދުމުގައި ވަޒީފާއަށް ނިކުމެއްޖެއެވެ.
އެމްއޭސީއެލުން އެކްސްގައި ކުރި ޕޯސްޓެއްގައި ބުނީ، އެ ކުންފުނީގެ މުވައްޒަފުން މިއަދު ގައުމީ ހެނދުމުގައި ވަޒީފާއަށް ނިކުތީ ގައުމީ ދުވަހުގެ މުނާސަބަތުގައި މުވައްޒަފުން ސަގާފީ ތަރިކައިގެ އަގުވަޒަން ކުރުމުގެ ގޮތުން ކަމަށެވެ.
އެމްއޭސީއެލުން އެކްސްގައި އާންމު ކޮށްފައިވާ ފޮޓޯތަކުން ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުގައި އެ ކުންފުނީގެ އަންހެން މުވައްޒަފުންނާއި ފިރިހެން މުވައްޒަފުން ގައުމީ ހެދުމުގައި ތިބި މަންޒަރު ފެނެއެވެ.
ދިވެހިރާއްޖޭގެ ޤައުމީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް ރަބީއުލްއައްވަލު މަހުގެ 01 ވަނަ ދުވަހެވެ. އެއީ މީލާދީ ސަނަތުން 1558ން 1573އަށް ޕޯޗުގީޒުން ރާއްޖޭގައި ހިންގި އަނިޔާވެރި ވެރިކަމަށް ބޮޑުތަކުރުފާނާއި އެތަކުރުފާނުގެ ބައިވެރިން ނިމުމެއް ގެންނަވައި ދިވެހި ޤައުމު ސަލާމަތްކޮށްދެއްވި ދުވަހެވެ.
މިއަހަރުގެ ޤައުމީ ދުވަހުގެ ރަސްމީ ޖަލްސާ ބާއްވާފައިވަނީ ޤައުމީ ދުވަހުގެ ބަޠަލު މުޙައްމަދު ތަކުރުފާނުގެ އުފަން ރަށްކަމުގައިވާ ހއ. އުތީމުގައެވެ. އެ ރަސްމިއްޔާތުގައި ވަނީ އުތީމުގެ ދަރިއެއް ކަމަށްވާ އާދަމް އަބްދުއްރަހްމާނަށް ނިޝާން މުލީގެ ޝަރަފުގެ އިއްޒަތް އަރުވާފަ އެވެ.
ކިޔުންތެރިންގެ ހިޔާލު