ޔޫކްރޭންގެ ރައީސް ވޮލޮޑޮމީރް ޒެލެންސްކީ އާއި އެެމެރިކާގެ ރައީސް ޑޮނަލްޑް ޓްރަމްޕް މިއަދު ވައިޓްހައުސްގައި ބައްދަލު ކުރައްވާނެ ކަމަށް ރިޕޯޓުތައް ބުނެފިއެވެ.

ޔޫކްރޭނާއި ރަޝިޔާ ކުރަމުން އަންނަ ހަނގުރާމަ ސުލްހަކުރުމަށް އެެމެރިކާގެ ރައީސް ޑޮނަލްޑް ޓްރަމްޕް ކުރަމުން އަންނަ މަސައްކަތުގައި ދެގައުމުގެ ލީޑަރުންނާ ބައްދަލުކުރައްވައި ސުލްހައިގެ މަޝްވަރާތައް ދަނީ ކުރައްވަމުންނެވެ.

ރައީސް ޑޮނަލްޑް ޓްރަމްޕް އާއި ޔޫކްރޭންގެ ރައީސް ވޮލޮޑޮމީރް ޒެލެންސްކީ ވައިޓްހައުސްގައި ބައްދަލުކުރައްވާ އިރު އެބައްދަލުވުމުގައި ޔޫރަޕްގެ ލީޑަރުންވެސް ބައިވެރިވެވަޑައިގަންނަވާނެ ކަމަށް ރިޕޯޓުތައް ބުނެއެވެ.

ބައްދަލުވުމުގައި ބައިވެރިވެވަޑައިގަތުމަށް އިނގިރޭސި ބޮޑުވަޒީރު ސާ ކެއިރް ސްޓާމާގެ އިތުރުން ފްރާންސްގެ ރައީސް އެމެނުއެލް މެކެރޫން އާއި ޖަރުމަނުގެ ޗާންސެލާ ފްރެޑްރިޗް މާޒް އާއި ޔޫރަޕިއަން ޔޫނިއަންގެ ރައީސް އުރްސުލާ ވޮން ޑާ ލެޔަން އަދި ނޭޓޯގެ ސެކްރެޓަރީ ޖެނެރަލް މާކް ރުއްޓޭ ވޮޝިންޓަނަށް ވަޑައިގެންފައިވާ ކަމަށް ވެސް ރިޕޯޓުތައް ބުނެއެވެ.

ޓްރަމްޕް ވަނީ ހޮނިހިރު ދުވަހު އެމެރިކާގެ އަލަސްކާގައި ހުންނަ އެމެރިކާ ސިފައިންގެ ބޭސް އެއްގައި ރަޝިޔާގެ ރައީސް ވްލަޑިމިއަ ޕޫޓިންއާ އެކު މަޝްވަރާކުރެއްވުމަށް ސަބިޓެއް ބާއްވަވައިފައެވެ.

އަލަސްކާ ސަމިޓް 2025 ނަމުން ނަންދީފައިވާ ކުރު އެސަމިޓު ނިމިގެން ދިޔައިރުވެސް އެއްވެސް ޑީލެއް ހެދިފައިނުވާ ކަމަށް ރިޕޯޓުތައް ބުނެއެވެ.