މެލޭޝިޔާގެ ބޮޑުވަޒީރު އަންވަރު އިބްރާހިމް ވަނީ ބަންގްލަދޭޝްގައި ދިރިއުޅޭ ރޮހިންޔާ ރެފިއުޖީންނަށް އިންސާނީ އެހީތެރިކަން ފޯރުކޮށްދިނުމަށްޓަކައި މިޔަންމާއަށް ވަފުދެއް ފޮނުވުމަށް ނިންމާފައިވާކަން އިޢުލާނުކުރައްވާފައެވެ. މި ވަފުދުގައި މެލޭޝިޔާގެ އިތުރުން އެ ސަރަޙައްދުގެ އެހެން ބައެއް ޤައުމުތައްވެސް ބައިވެރިވާނެއެވެ.

ދެކުނު ބަންގްލަދޭޝްގެ ރެފިއުޖީ ކޭމްޕުތަކުގައި އެއް މިލިއަނަށްވުރެ ގިނަ ރޮހިންޔާ ރެފިއުޖީން ދިރިއުޅެމުންދެއެވެ. މީގެ ތެރެއިން ގިނަ މީހުންނަކީ 2017 ވަނަ އަހަރު މިޔަންމާގެ އަސްކަރިއްޔާއިން ރޮހިންޔާ މުސްލިމުންނަށް ދިން އަނިޔާވެރި ޙަމަލާތަކާ ގުޅިގެން އެ ޤައުމުން ފިލައިގެން އައި މީހުންނެވެ. އެހެންނަމަވެސް، މީގެ ކުރިންވެސް މި ކޭމްޕުތަކުގައި ދިރިއުޅެމުން އައި ރެފިއުޖީންވެސް މީގެ ތެރޭގައި ހިމެނެއެވެ.

މިޔަންމާގައި ރޮހިންޔާ މުސްލިމުންނަށް ކުރަމުންދާ އަނިޔާތަކާއި ގޯނާތަކުގެ ސަބަބުން، ގިނަ ޢަދަދެއްގެ މީހުން މިޔަންމާއާއި ބަންގްލަދޭޝްގެ ސަރަޙައްދީ ރޮނގު ހުރަސްކޮށް ބަންގްލަދޭޝްގެ ހިމާޔަތަށް އެދެމުންދެއެވެ. ޔޫ.އެން.އެޗް.ސީ.އާރުގެ މަޢުލޫމާތުން ދައްކާގޮތުގައި، ވޭތުވެދިޔަ 18 މަސްދުވަހުގެ ތެރޭގައި 150،000 އަށްވުރެ ގިނަ ރޮހިންޔާ ރެފިއުޖީން ބަންގްލަދޭޝްގެ ކޮކްސް ބާޒާރަށް ހިޖުރަކޮށްފައިވެއެވެ.

ރޮހިންޔާ ރެފިއުޖީންގެ ޙައްޤުތަކަށް ވަކާލާތުކުރުމަށްޓަކައި މިޔަންމާއަށް ވަފުދެއް ފޮނުވުމަށް ނިންމާފައިވާކަން އަންވަރު އިބްރާހިމް އިޢުލާނުކުރެއްވީ ބަންގްލަދޭޝްގެ އިންތިޤާލީ ސަރުކާރުގެ އިސްވެރިޔާ މުޙައްމަދު ޔޫނުސް އެ ޤައުމަށް ކުރައްވަމުންގެންދަވާ ތިން ދުވަހުގެ ދަތުރުފުޅެއްގެ ތެރޭގައެވެ.

މުޙައްމަދު ޔޫނުސްއާއެކު ބޭއްވެވި ނޫސްވެރިންގެ ބައްދަލުވުމެއްގައި އަންވަރު އިބްރާހިމް ވިދާޅުވެފައިވަނީ މި ވަގުތު އެންމެ އިސްކަމެއް ދެއްވަނީ މިޔަންމާގައި ޞުލްޙަ ޤާއިމުކުރުމަށާއި، ދަތިތައް ތަޙައްމަލުކުރަމުންދާ މީހުންނަށް ތަސައްލީއެއް ހޯދައިދިނުމަށް ކަމަށެވެ. މީގެ ތެރޭގައި ރެފިއުޖީންނާއި ފަހުން އައި ބާރުގަދަ ބިންހެލުމުގައި ޙާލުގައި ޖެހުނު މީހުންވެސް ހިމެނޭކަމަށް އޭނާ ފާހަގަކުރެއްވިއެވެ.

މިޔަންމާއަށް ދަތުރުކުރާ ވަފުދުގެ ކަންކަން ވިލަރެސްކުރައްވާނީ މެލޭޝިޔާގެ ޚާރިޖީ ވަޒީރު ކަމަށް އަންވަރު އިބްރާހިމް ވިދާޅުވިއެވެ. ކުރިއަށް އޮތް ހަފްތާތަކުގައި މި ވަފުދު މިޔަންމާއަށް ދަތުރުކުރުމަށް ހަމަޖެހިފައިވާއިރުމެލޭޝިޔާއާއި ބަންގްލަދޭޝްގެ އިތުރުން އިންޑޮނޭޝިޔާ، ފިލިޕީންސް އަދި ތައިލެެންޑުގެ މަންދޫބުންވެސް މި ވަފުދުގައި ބައިވެރިވާނެ ކަމަށް އަންވަރު އިބްރާހިމް ހާމަކުރެއްވިއެވެ.

ދެކުނު އިރުމަތީ އޭޝިޔާގެ އިއްތިޙާދު، އާސިއާންގެ މުޤައްރިރުގެ މަޤާމުގައި ހުންނެވި އަންވަރު އިބްރާހިމް އިތުރަށް ފާހަގަކުރެއްވީ، އެތައް ހާސް ރޮހިންޔާ ރެފިއުޖީންގެ ކަންކަން ބެލެހެއްޓުމުގެ ބުރަ ޒިންމާ ބަންގްލަދޭޝުން އުފުލަންޖެހިފައިވާތީ، ބައިނަލްއަޤްވާމީ މުޖުތަމަޢުގެ ޤައުމުތަކުން މިކަމާމެދު ކަންބޮޑުވުން ފާޅުކުރާ ކަމަށެވެ.

މި ދަތުރުފުޅަކީ ރޮހިންޔާ ރެފިއުޖީންގެ މައްސަލައަށް ދެމެހެއްޓެނިވި ޙައްލެއް ހޯދުމަށް ކުރެވޭ މުހިންމު މަސައްކަތެއްގެ ގޮތުގައި ބެލެވެއެވެ. މި ވަފުދުގެ މަސައްކަތުން މިޔަންމާގެ ސަރުކާރާއެކު މަޝްވަރާކޮށް، ރޮހިންޔާ މުސްލިމުންގެ ޙައްޤުތައް ރައްކާތެރިކުރުމަށާއި، އެ މީހުންނަށް އަމާން މާޙައުލެއްގައި ދިރިއުޅެވޭނެ ގޮތް ހޯދައިދިނުމަށް މަގުފަހިވެގެންދާނެ ކަމަށް އުންމީދުކުރެވެއެވެ.

މި މައްސަލައަކީ ހަމައެކަނި ބަންގްލަދޭޝްގެ މައްސަލައެއްގެ ގޮތުގައި ނުބަލައި، ސަރަޙައްދީ އަދި ބައިނަލްއަޤްވާމީ ފެންވަރުގައި އެޑްރެސްކުރަންޖެހޭ މައްސަލައެއްގެ ގޮތުގައި ދެކި، އެކަމަށް އެކަށީގެންވާ ސަމާލުކަމެއް ދިނުމަކީ މުހިންމު ކަމެކެވެ. މިގޮތުން، ރޮހިންޔާ ރެފިއުޖީންގެ އަސާސީ ޙައްޤުތައް ކަށަވަރުކޮށްދިނުމަށާއި، އެ މީހުންނަށް ރައްކާތެރި އަދި ޝަރަފުވެރި ދިރިއުޅުމެއް ކަށަވަރުކޮށްދިނުމަށް ބައިނަލްއަޤްވާމީ މުޖުތަމަޢުގެ އެހީތެރިކަން ހޯދުމަކީ މުހިންމު ކަމެކެވެ.