އައްޑޫ ސިޓީ ހިތަދޫ އަވަށުގެ 19 ބިމެއް ދޫކުރުމަށް އެ ސިޓީ ކައުންސިލުން އިއުލާންކޮށްފިއެވެ.

އައްޑޫ ކައުންސިލުން ކުރި އިއުލާންގައިވާ ގޮތުން މި ފުރުސަތު ހުޅުވާލައިފައި ވަނީ ބިން ކުއްޔަށް ހިފަން ޝައުގުވެރިވެ ރަޖިސްޓްރީ ކޮށްފައިވާ ފަރުދުންގެ ވިޔަފާރި، ކުންފުނި އަދި ޕާޓްނަޝިޕްތަކަށެވެ.

މި ބިންތަށް ދޫކުރަން ހަމަޖެހިފައި ވަނީ ރީޓެއިލް އަދި ހޯލްސޭލް ވިޔަފާރީގެ މަސައްކަތްތައް ކުރުމަށް އިތުރުން، ކެފޭ ރެސްޓޯރެންޓާއި، ގާ އެޅުމުގެ މަސައްކަތުގެ އިތުރުން، ހެވީ/ލައިޓް އިންޑަސްޓްރިއަލް ބޭނުމަށެވެ.

އަދި ކުއްޔަށް ދޫކުރުމަށް ހަމަޖެހިފައިވަނީ 1،500 އަކަފޫޓުން ފެށިގެން 6،493 އަކަފޫޓުގެ ބިންތަކެވެ.

ބީލަމުގައި ބައިވެރިވުމަށް ޝައުގުވެރިވާ ފަރާތްތަކުން 300 ރުފިޔާގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭއިރު، ބީލަމުގައި ރަޖިސްޓްރީ ވުމުގެ މުއްދަތު އިއްޔެ ފެށިގެން މި މަހުގެ 21 ވަނަ ދުވަހާއި ހަމައަށް ވަނީ ހުޅުވާލެވިފައެވެ. ރަޖިސްޓްރީ ވުމަށް ހުޅުވާލާފައިވަނީ ބަންދު ނޫން ކޮންމެ ދުވަހެއްގެ ހެނދުނު 8:00 އިން މެންދުރުފަހު 2:00 އަށް ހަމައަށެވެ.

ބީލަމުގައި ބައިވެރިވުމަށް ރަޖިސްޓްރީ ކުރާ ފަރާތްތަކަށް ބިން ކުއްޔަށް ދޫކުރުމަށްޓަކައި ދެވޭ މައުލޫމާތު ކަރުދާސް އަދި ބީލަން ހުށަހަޅާ ފޯމް އެ އިދާރާއިން މެއިލް ކުރާނެއެވެ.

ބީލަން ބަލައިގަތުމާއި ބީލަން ހުޅުވުން އޮންނާނީ އައްޑޫ ސިޓީ ކައުންސިލް އިދާރާގައި އަންނަ ސެޕްޓެމްބަރު މަހުގެ ހަތް ވަނަ ދުވަހުގެ ހެނދުނު 10:00 ގައެވެ.