ޣައްޒާގައި ހިންގާ ނަސްލުނައްތާލުގެ ޖަރީމާއާއި، ޣައްޒާގައި ބަނޑުހައިހޫނުކަން އާންމުކުރުމާ ދެކޮޅަށް އޮސްޓްރޭލިއާގެ ސިޑްނީގެ އާންމުން މަގުތަކަށް ނުކުމެ، އޮސްޓްރޭލިއާ ސަރުކާރާއި ދުނިޔެއަށް ވަރަށް ވަރުގަދަ މެސެޖެއް ދީފިއެވެ.

މޫސުން ގޯސްވެފައި ވުމާއެކުވެސް، މުޒާހަރާއަށް ނުކުތް އާންމުންގެ ގިނަކަމާއެކު، ސިޑްނީގެ މަގުތައް ފުރާލިއެވެ.

މަގުތަކުގައި އަޑުއުފުލަމުން މުޒާހަރާގެ ބައިވެރިން ސިޑްނީ ހަބަރ ބްރިޖް ހުރަސްކުރިއިރު، ބްރިޖް ބަންދުވެ މުޅި ސަރަހައްދު ޓްރެފިކް ހުއްޓުމަކަށް އައެވެ.

ބައެއް މީހުން އަންދާޒާކުރާ ގޮތުން ތިންލައްކައަށްވުރެ ގިނަމީހުން މުޒާހަރާއަށް ނުކުމެފައި ވެއެވެ.

މިއީ، އޮސްޓްރޭލިއާގައި ޣައްޒާ މައްސަލާގައި މިހާ ގިނަ އާންމުން މަގުތަކަށް ނުކުތް ފުރަތަމަ ފަހަރު ކަމަށްވެއެވެ.

މުޒާހަރާއަށް ނުނިކުތުމަށް އޮސްޓްރޭލިއާގެ ބޮޑުވަޒީރު ކްރިސް މިންސް ޕާލަމެންޓް މެމްބަރުންނަށް އަންގާފައި ވަނިކޮށްވެސް، ލޭބަރ ޕާޓީއަށް ނިސްބަތްވާ 5 މެމްބަރުން މުޒާހަރާގައި ބައިވެރިވިއެވެ.

އަދި މަޝްހޫރު ވިކިލީކްސްގެ ފައުންޑަރ ޖޫލިއަން އަސާންޖްވެސް މުޒާހަރާގައި ބައިވެރިވިއެވެ.

މުޒާހަރާއަށް ނުކުތް އާންމުންނާއި، ސިޔާސީ ފަރާތްތަކާއި، އެކްޓިވިސްޓުންވަނީ އިސްރާއީލުން ޣައްޒާގައި ހިންގާ ނަސްލުނައްތާލުމުގެ އަމަލުތައް ވަރަށް ބޮޑަށް ކުށްވެރިކޮށް އަޑުއުފުލާފައެވެ. ހަމަ އެއާއެކު، އިސްރާއީލަށް ހަތިޔާރު ފޯރުކޮށްދިނުމުގައި އޮސްޓްރޭލިއާ ސަރުކާރުގެ  ބައިވެރިވުން އަދިވެސް އޮންނާތީ އެކަން ވަރަށް ބޮޑަށް ކުށްވެރި ކޮށްފައި ވެއެވެ.

ޣައްޒާގެ އާންމުންގެ ބޮލަށް ބޮންއަޅަން އިސްރާއީލު ސިފައިން ބޭނުންކުރާ އެފް-35 ޖެޓުތައް ފޯރުކޮށްދޭ ގްރޫޕްގައި އޮސްޓްރޭލިއާވެސް ހިމެނެއެވެ.

އާންމުންނާއި، އަދި މުޒާހަރާގައި ވާހަކަ ދެއްކި އެކިއެކި ފަރާތްތަކުންވަނީ، އިސްރާއީލުން ހިންގާ ނަސްލުނައްތާލުން ވަގުތުން ހުއްޓާލުމަށާއި، ޣައްޒާގެ އާންމުން ބަނޑަށްޖެއްސުންވެސް ހުއްޓުމަކަށް ގެނައުމަށެވެ.

އަދި އިސްރާއީލަށް ދަތިކުރުމަށް އޮސްޓްރޭލިއާ ސަރުކާރަށާއި، ދުނިޔެއަށް އެމީހުން ގޮވާލާފައި ވެއެވެ.

ސިޑްނީ މުޒާހަރާ ރޭވީ އޮސްޓްރޭލިއާގެ “ޕަލެސްތައިން އެކްޝަން ގްރޫޕް” އިންނެވެ. މުޒާހަރާ ހުއްޓުވަން ކޯޓުތަކަށް ހުށަހެޅުނު މައްސަލަތަކުގައި އޮސްޓްރޭލިއާގެ ސުޕްރީމް ކޯޓުން މައްސަލަ ނިންމީ “ޕަލެސްތައިން އެކްޝަން ގްރޫޕް” އާ އެއްކޮޅަށެވެ.