ޣައްޒާގެ ހިސާރު ފޫއަޅުވާލަން އަންނަ ބައިނަލްއަގްވާމީ އެކްޓިވިސްޓުން ހިމެނޭ “ހަންޑަލާ” ފްރީޑަމް ފްލޮޓިލާ ބޯޓު، ޣައްޒާއާ ގާތްވާ ވަރަކަށް ޒަޔަނިސްޓު ސިފައިންގެ ފާރަލުމާއި، ހަރަކާތްތައް އިތުރުކޮށްފިއެވެ.
އެގޮތުން، ބޯޓު ދަތުރުކުރަމުންދާ ސަރަހައްދުން އިސްރާއީލު ސިފައިންގެ 20 ވަރަކަށް ޑްރޯން، ރޭގައި ބޯޓު ކައިރިން ވައިގެތެރޭގައި އުދުހެނިކޮށް ފެނިފައި ވާކަމަށް، ބޯޓުން ބުނެފައި ވެއެވެ.
ޣައްޒާގެ ހިސާރު ފޫއަޅުވާލަން މީގެކުރިން ދަތުރުކުރި “މެޑްލީން” ފްރީޑަމް ފްލޮޓިލާއަށް އިސްރާއީލު ސިފައިން ހަމަލާދިން ހިސާބާ، “ހަންޑަލާ” ފްރީޑަމް ފްލޮޓިލާ މިހާރު އަރާ ހަމަވަމުންދާ ކަމަށް ޚަބަރުތައް ބުނެއެވެ.
ބޯޓު މިހާރު ދަތުރުކުރަމުން ގެންދަނީ، މިސްރާ ގާތުން ބައިނަލްއަގްވާމީ ކަނޑުގެ ސަރަހައްދުންނެވެ.
“ހަންޑަލާ” ފްރީޑަމް ފްލޮޓިލާގައި ތިބި މީހުންވެސް މިހާރުވަނީ، އިސްރާއީލު ސިފައިން އެ ބޯޓަށް ހަމަލާދީ އަދި ބޯޓަށް އަރައިގަންނާނެ ކަމަށް ފުރިހަމަ ތައްޔާރުވެފައެވެ.
“ހަންޑަލާ” ފްރީޑަމް ފްލޮޓިލާ ޣައްޒާއަށް ދިއުމަށް އިޓަލީގެ ގަލިޕޮލީން ފުރާފައިވަނީ މިދިޔަ އާދީއްތަ ދުވަހުއެވެ.
މިއީ، ފްރީޑަމް ފްލޮޓިލާ ކޯލިޝަން – އެފްއެފްސީން ޣައްޒާގެ ހިސާރު ފޫއަޅުވާލަން ފޮނުވަމުންދާ ބޯޓުތަކުގެ ތެރެއިން އެންމެފަހުން ފުރުވާލި ބޯޓެވެ.
މި ބޯޓުގައި، މައިގަނޑުގޮތުގައި ގެންދަނީ އިންސާނީ އެހީގެ ސާމާނެވެ. އޭގެ ތެރޭގައި ހިމެނެނީ ކާބޯތަކެއްޗާއި، ބޭބީ ފޯމިއުލާއާއި، ބޭހެވެ. ބޯޓުން ދަތުރުކުރަނީ ބައިނަލްއަގްވާމީ އެކްޓިވިސްޓުންނާއި، މެޑިކަލް މީހުންނެވެ.
އެކްޓިވިސްޓުންގެ ގޮތުގައި، މަޝްހޫރު ތަރިންނާއި، ބައެއް ގައުމުތަކުގެ ޕާލަމެންޓް މެމްބަރުންވެސް ހިމެނެއެވެ.
އެހެންކަމުން، ބޯޓުގައި ތިބި އެކްޓިވިސްޓުން ގެންދަނީ، އެމީހުންނާއި އަދި ބޯޓުގެ ހިމާޔަތަށް ފިޔަވަޅު އަޅައިދިނުމަށް އެމީހުން ނސްބަތްވާ ގައުމުތަކަށް އިލްތިމާސްކުރަމުންނެވެ.
ކިޔުންތެރިންގެ ހިޔާލު