އިންޑިއާ ސަރުކާރުގެ އެހީގެ ދަށުން އައްޑޫ ސިޓީގައި ކުރިއަށްގެންދިޔަ ބައެއް މަޝްރޫއުތަކުގެ ނިމުން ފާހަގަކޮށްފިއެވެ.

އެ މަޝްރޫއުތަކުގެ ނިމުން ފާހަގަކޮށްފައިވަނީ އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ހަވީރު ރައީސް އޮފީހުގައި ބޭއްވި ރަސްމިއްޔާތެއްގައެވެ.

އެ ރަސްމިއްޔާތުގައި މަޝްރޫއުތަކުގެ ނިމުން ވާޗުއަލްކޮށް ފާހަގަކޮށްދެއްވީ މޯދީއެވެ. އަރިހުގައި ރައީސް ޑރ. މުހައްމަދު މުއިއްޒުވެސް ހުންނެވިއެވެ.

މޯދީ ނިމުން ފާހަގަކޮށްދެއްވި މަޝްރޫއުތަކުގެ ތެރޭގައި އައްޑޫ މަގުތައް ތަރައްގީކުރުމުގެ މަޝްރޫއު ހިމެނެއެވެ. އެ މަޝްރޫއަކީ އިންޑިއާއިން ރާއްޖެއަށް ދޫކުރި ލައިން އޮފް ކްރެޑިޓް (އެލްއޯސީ)ގެ ދަށުން އިންޑިއާގެ ކުންފުންޏެއް ކަމަށްވާ އެފްކޮންސް އިންފްރާސްޓްރަކްޗާއިން ކުރިއަށްގެންދިޔަ މަޝްރޫއެކެވެ.

އެ މަޝްރޫއުގެ ދަށުން އައްޑޫގެ ހަ އަވަށް އެކުލެވޭހެން 40 ކިލޯމީޓަރުގެ މަގު ވަނީ ތަރައްގީކޮށްފައެވެ. އަދި އެ މަޝްރޫއުގެ ދަށުން ގާއިމުކޮށްފައިވާ ޑްރެއިނޭޖް ސިސްޓަމަކީ އައްޑޫގެ ހަ އަވަށް އެކުލެވޭނެހެން ގާއިމުކޮށްފައިވާ ނިޒާމެކެވެ.

އަދި ވަނީ އެ މަޝްރޫއުގެ ދަށުން 3.4 ކިލޯ މީޓަރުގެ މަގު އަލުން ރިސާފެސްކޮށް ހުރިހާ ރަށަކަށް ބޭނުންވާ މަގުބައްތިތަކާއި ސަލާމަތީ ހިދުމަތްތަކަށް ބޭނުންވާ ސަވައިލަންސް ކެމެރާތައް މަގުގެ އެކި ސަރަހައްދުތަކުގައި ގާއިމުކޮށްފައެވެ.

ހިތަދޫ ގައުކެނޑެ ސަރަހައްދުން ފެށިގެން މަރަދޫއަށް ހަންކެނޑެ ހުރަސްކޮށް ހަތަރު ލޭންގެ މައްޗަށް އެކުލެވޭ ގޮތަށް 1.463 ކިލޯމީޓަރުގެ އާ މަގު ހަދައި ވަނީ ޓްރެފިކަށް ހުޅުވާލާފައިފައެވެ. އެއީވެސް މި މަޝްރޫއުގެ ދަށުން ކުރި މަަސައްކަތެކެވެ.

މީގެ އިތުރުން މޯދީ ދެން ނިމުން ފާހަގަކުރައްވާފައިވަނީ ހިތަދޫގައި ހަދައިފައިވާ އައުޓް ޑޯ ދެ ޖިމާއި، ހިތަދޫގައި ހަދައިފައިވާ ސްމޯލް ސްކޭލް ފިޝް ޕްރޮސެސިން ޕްލާންޓާއި، ގދ. ވާދޫގައި ތަރައްގީކޮށްފައިވާ އައުޓްޑޯ ޖިމުގެ މަސައްކަތެވެ.

މޯދީ ވަނީ ގއ. ގެމަނަފުށީގައި ތަރައްގީކޮށްފައިވާ ޔޫތު ސެންޓަރާއި ށ. ކަނޑިތީމުގައި ތަރައްގީކޮށްފައިވާ ވޮލީ ކޯޓުގެ މަސައްކަތުގެ ނިމުންވެސް ފާހަގަކޮށްދެއްވައިފައެވެ.