އަންނަ އަހަރުގެ ޖެނުއަރީ މަހު ނ. ވެލިދޫގައި ސީޕްލޭން ޕްލެޓްފޯމެއް ގާއިމުކޮށް، ސީޕްލޭން އޮޕަރޭޝަން ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ނ. އަތޮޅުގެ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ވެލިދުއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް މިރޭ ވިދާޅުވީ އަންނަ އަހަރު ޖެނުއަރީ މަހު ވެލިދޫގައި ސްޓޭޝަންކޮށްފައި ބާއްވާ ސީ އެމްބިއުލާންސެއް ގާއިމުކޮށްދެއްވާނެ ކަމަށެވެ.

ވިހަފަރުގައި ހަދާ އެއާޕޯޓު ގާއިމުކުރެވެންދެން ވެސް އަދި ފަހުން ވެސް ބޭނުންވަންޏާ ބޭނުންކުރުމަށްޓަކައި ވެލިދުއަށް ހާއްސަކޮށްގެން ސީޕްލޭން ޕްލެޓްފޯމެއް އަންނަ އަހަރު ޖެނުއަރީ މަހު ގާއިމުކޮށްދީ، ގަވާއިދުން ސީޕްލޭން އޮޕަރޭޝަން ފަށައިދެއްވާނެ ކަމަށް އެ މަނިކުފާނު ވިދާޅުވިއެވެ.

ރައީސް ވިދާޅުވީ އެއާޕޯޓުގެ އުންމީދު ވެސް ހަގީގަތަކަށް ހައްދަވައިދެއްވާނެ ކަމަށާއި ވިހަފަރުގައި ގާއިމުކުރާ އެއާޕޯޓުގެ އަމަލީ މަސައްކަތް އަންނަ އަހަރުގެ ކުރީކޮޅު ފަށައި، ބާރު ސްޕީޑުގައި ގެންގޮސް، ވަރަށް ފުރިހަމަކަމާއެކު ނިންމަވައިދެއްވާނެ ކަމަށެވެ.