ތިނަދޫ ސިޓީގައި ހިނގި ނުރައްކާތެރި އެކްސިޑެންޓްގައި އަނިޔާވި ޒުވާނާ ނިޔާވެއްޖެއެވެ.

ނިޔާވެފައި ވަނީ ގދ. ތިނަދޫ، ތީންމުތީ، އުމުރުން 31 އަހަރުގެ ޒާހިޔާ ނިޔާޒުއެވެ.

އެ އެކްސިޑެންޓް ހިނގާފައި ވަނީ މިދިޔަ އޭޕްރީލް 27 ވަނަ ދުވަހުގެ 15:47 ހާއިރު، ތިނަދޫ ހުކުރު މިސްކިތް ކައިރީގައި ކާރަކާއި ސައިކަލެއް ޖެހި އެވެ. މި އެ އެކްސިޑެންޓްގައި ޒާހިޔާގެ ބޮލަށް ވަނީ ބޮޑެތި އަނިޔާތަކެއް ލިބިފައެވެ.

ޒާހިޔާއަށް ފުރަތަމަ ފަރުވާ ދިނީ ޑރ. އަބްދުއްސަމަދު މެމޯރިއަލް ހޮސްޕިޓަލްގައެވެ. އޭގެފަހުން ހާލު ސީރިއަސްވެ އެމަޖެންސީގައި މާލެ ގެނެސް އައިޖީއެމްއެޗްގައި ފަރުވާދިނުމަށްފަހު އިތުރުވާއަށް އިންޑިއާއަށް ގެންދިޔައެވެ.

ޒާހިޔާ ނިޔާވީ އިތުރު ފަރުވާއަށް އިންޑިއާއަށް ގެންގޮސް ފަރުވާ ދިނުމަށްފަހު މާލެ އައިފަހުން ހާލު ދެރަވެ، އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށް މިއަދުގެ ވަގުތެއްގައެވެ.

ޒާހިޔާގެ މައްޗަށް ކުރެވޭ ކަށުނަމާދު މިރޭގެ އިޝާ ނަމާދަށްފަހު އާސަހަރާ މިސްކިތުގައި އޮންނާނެއެވެ.