ޣައްޒާގައި ހުންނަ އެންމެ ބޮޑު ހޮސްޕިޓަލް ކަމަށްވާ އަލް ޝިފާ މެޑިކަލް ހޮސްޕިޓަލުން ކަރަންޓު ކެނޑި، އެތަނުގައި މިހާރުވެސް ތިބި ޒަޚަމްވެފައިވާ މީހުންނާއި ބަލިމީހުންގެ ފުރާނައަށް ނުރައްކާވެއްޖެއެވެ.
އަލް ޝިފާ ހޮސްޕިޓަލްގެ ޑިރެކްޓަރ މުހައްމަދު އަބޫ ސަލްމިއާ ވިދާޅުވީ، ހޮސްޕިޓަލުން ކަރަންޓު ކެނޑުނީ، ހޮސްޕިޓަލަށް ކަރަންޓު ދިނުމަށް ބޭނުންކުރާ ޖަނަރޭޓަރުތަކަށް ތެޔޮލިބުން ހުއްޓިގެން ކަމަށެވެ.
އަލް ޝިފާ ހޮސްޕިޓަލުން ކަރަންޓު ކެނޑުނުއިރު، ޣައްޒާގެ ދެކުނުގައި ހުންނަ އެންމެ ބޮޑު ހޮސްޕިޓަލް ކަމަށްވާ ނަސަރު ހޮސްޕިޓަލުން މިއަދު ބުނެފައިވަނީ، އެ ހޮސްޕިޓަލުގައި މިހާރު ތެޔޮ ހުރީ 24 ގަޑިއިރު ކަރަންޓު އުފެއްދޭ ވަރަށް ކަމަށެވެ.
ކަރަންޓު ލިބޭގޮތް ނުވެއްޖެނަމަ ނަސަރު ހޮސްޕިޓަލުގެ އައިސީޔޫގައި ތިބި ބަލި މީހުންނާއި، އިންކިއުބޭޓަރުގައި ތިބި ތުއްތު ކުދިން ސަލާމަތް ކުރެވޭނެ އެއްވެސް ގޮތެއް ނެތް ކަމަށް ޚަބަރުތައް ބުނެއެވެ.
އަލް ޝިފާ ހޮސްޕިޓަލާއި، ނަސަރު ހޮސްޕިޓަލަށް ކަރަންޓުގެ މައްސަލަ މި ކުރިމަތިވީ، ޒަޔަނިސްޓު ސިފައިން މުޅި ޣައްޒާއަށް އެއްގަމު މަގުންނާއި، ވައިގެމަގުން ވަރުގަދަ ހަމަލާތައް ހުއްޓާނުލާ ދެމުންގެންދާ ވަގުތެއްގައެވެ.
މި ހަމަލާތަކުގައި ޒަޚަމްވާ މީހުންނަށް ފުރިހަމަ ފަރުވާ ދެވޭނޭ އެއްވެސް ހޮސްޕިޓަލެއް ޣައްޒާގައި ނެތެވެ.
އިސްރާއީލު ސިފައިންވަނީމ، ޣައްޒާގައި ހުރި ހުރިހާ ހޮސްޕިޓަލަށް ބޮންއަޅައި ހަލާކުކޮށްލާފައެވެ.
އަދި މިއަހަރުގެ މާޗްމަހުގެ 2 ވަނަ ދުވަހުން ފެށިގެން ޣައްޒާއަށް އިންސާނީ އެހީއާއި، ބޭހާއި ތެޔޮ އެތެރެކުރުން ހުއްޓުވާފައި އޮތުމުގެ ސަބަބުން މިހާރު ކިރިޔާވެސް ޚިދުމަތެއް ދެވޭ ހާލަތުގައި ހުރި ހޮސްޕިޓަލްތައް މިދަނީ ހުއްޓެމުންނެވެ.
ޣައްޒާއަށް ދެމުންގެންދާ ހަމަލާތަކުގައި ޒަޚަމްވާ މީހުން ހޮސްޕިޓަލްތަކަށް ގެނަޔަސް، މިހާރު ކިރިޔާވެސް ޚިދުމަތެއް ދެވޭ ހާލަތުގައި ހުރި ތަންތަނަށް ކަރަންޓު ނުލިބި، ކުރެވޭނޭ އެއްވެސް ކަމެއް ނެތޭނެ ކަމަށް، ޣައްޒާގެ ހޮސްޕިޓަލްތަކުން ބުނެއެވެ.
ކިޔުންތެރިންގެ ހިޔާލު