ސިންގަޕޫރަކީ ދިވެހީގެ ތަރައްގީގައި ނަމޫނާއަކަށް ބަލާ ގައުމެއް ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.

ރައީސް ސިންގަޕޫރަށް ކުރައްވަމުން ގެންދަވާ ދަތުރުފުޅުގެ ތެރެއިން ސިންގަޕޫރުގެ ރައީސް ތަރްމަން ޝަންމުގަރަނަމް ދެއްވި ޖާފަތުގައި ބައިވެރިވެވަޑައިގެން ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ މި ދަތުރުފުޅާއެކު ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށާއި ދެ ގައުމުގެ ދެމެދު އޮތީ ޒަމާންވީ ބަދަހި ގުޅުމެއް ކަމަށެވެ.

ރައީސް ވިދާޅުވީ ސިޔާސީ ގުޅުން ގާއިމުވުމުގެ މާކުރިންވެސް ދިވެހި ދަތުރުވެރިންނަށް ސިންގަޕޫރަކީ މުހިންމު މަންޒިލެއް ކަމަށާއި އެ ގުޅުންތައް އިތުރަށް ބަދަހިވެ، ރާއްޖޭގެ ކުރިއެރުމާއި ތަރައްގީގައި ސިންގަޕޫރަކީ މުހިންމު ބައިވެރިއެއް ކަމަށެވެ. އަދި ތަރައްގީގައި ސިންގަޕޫރަކީ ނަމޫނާއަކަށް ބަލާ ގައުމެއް ކަމަށް އެ މަނިކުފާނު ވިދާޅުވިއެވެ.

އެކިއެކި ދަތި ދުވަސްތަކުގައި ސިންގަޕޫރުން އެހީތެރިކަން ފޯރުކޮށްދީފައިވާކަން ފާހަގަކުރައްވަމުން ރައީސް ވިދާޅުވީ ވިޔަފާރި އާއި އެކިއެކި ދާއިރާތަކުން ވެސް ސިންގަޕޫރުން އެހީތެރިކަން ފޯރުކޮށްދެމުންދާ ކަމަށެވެ.