ރ. ފައިނުގައި ހިނގި އެކްސިޑެންޓުގައި އަނިޔާވި ތިން މީހުންނަށް ފަރުވާދެމުންދަނީ ވެންޓިލޭޓަރުގައި ބާއްވައިގެން ކަމަށް އައިޖީއެމްއެޗުން ބުނެފިއެވެ.

ފައިނުގައި މިދިޔަ ބުރާސްފަތި ދުވަހުގެ ރޭ ކަސްތަރުކުރަން ނުކުމެ އުޅުނު ބައެއްގެ ގައިގައި ސައިކަލަކުން ޖެހިގެން ހިނގި އެކްސިޑެންޓުގައި ދެ ކުޑަކުދިން ހިމެނޭގޮތަށް ހަތަރު މީހަކަށް އަނިޔާވިއެވެ. އޭގެ ތެރެއިން ދެ ކުއްޖަކާއި މީހެއްގެ ހާލު ސީރިއަސްވެގެން އިއްޔެ ވަނީ މާލެ ގެނެސްފައެވެ.

އައިޖީއެމްއެޗުން ބުނީ އެކްސިޑެންޓުގައި އިތުރު ފަރުވާއަށް މާލެ ގެނައި ތިން މީހުންނަށް ވެސް ފަރުވާދެނީ ވެންޓިލޭޓަރުގައި ކަމަށާއި އެ މީހުން ހާލު އަދިވެސް ސީރިއަސް ކަމަށެވެ.

އައިޖީއެމްއެޗްގައި ފަރުވާދެމުން އަންނަނީ 49 އަހަރުގެ މީހަކާއި 14 އަހަރުގެ ކުއްޖެއްގެ އިތުރުން 16 އަހަރުގެ ކުއްޖަކަށެވެ.

އެނގިފައިވާ ގޮތުގައި ސައިކަލުގައި ތިބީ ދެ ކުދިންނެވެ. އަދި ސައިކަލު ގޮސް ޖެހިގެން އަނިޔާވި މީހާއަކީ ފައިނަލު ސްކޫލުގެ ޓީޗަރެކެވެ.