ގުދުސްގައި ހުންނަ މުސްލިމުންގެ ތިންވަނައަށް އެންމެ މުގައްދަސް ބިނާކަމުގައިވާ މަސްޖިދުލް އަގްސާ، އިސްރާއީލުން އަލުން ހުޅުވާލައިފިއެވެ.
އިސްތިއުމާރީ އިސްރާއީލުން މިމަހުގެ 13 ވަނަ ދުވަހު އީރާނަށް ބޮންއަޅަން ފެށުމާއެކު، އަގްސާ މިސްކިތް މުސްލިމުންނަށް އެއްވެސް ވަރަކަށް ނުވަދެވޭނޭހެން ބަންދުކުރިއެވެ.
އަގްސާ މިސްކިތް ބަންދުކުރީ “ސަލާމަތީ” ސަބަބުތަކަށްޓަކައި ކަމަށް އިސްރާއީލުން ބުނެފައި ވެއެވެ.

ވޭތުވެދިޔަ 12 ދުވަހު މިސްކިތް ހުރީ ބަންދުކޮށްފައެވެ. ނަމާދުކުރަން ނުވަތަ އަޅުކަމެއް ފުރިހަމަކުރަން ވިޔަސް، އެއްވެސް މީހަކަށް މިސްކިތަކަށް ނުވަދެވޭނޭހެން ހުރިހާ ދޮރުތައް ހުރީ ބަންދުކޮށްފައެވެ.
އިސްރާއީލުން އަގްސާ މިސްކިތް ބަންދުކުރުމުން ފަލަސްތީނު ރައްޔިތުން ވަރަށް ބޮޑަށް ނުރުހުން ފާޅުކޮށް އެކަމާ ދެކޮޅަށް އަޑުއުފުލަމުން ގެންދިޔައެވެ. އަދި މިސްކިތަށް ނުވަދެވޭތީ އެކަމުގެ މާޔޫސްކަން ވެރިވެގެންދިޔައެވެ.
މަސްޖިދުލް އަގްސާ ބަލަހައްޓާ ވަގްފް އޮފީހާއި، އިންސާނީ ހައްގުތަކަށް މަސައްކަތްކުރާ ޖަމްއިއްޔާ ޖަމާއަތްތަކުން އިސްރާއީލުގެ ނިންމުން ވަރަށް ބޮޑަށް ކުށްވެރި ކުރަމުންގެންދިޔައެވެ.

އިސްރާއީލުގެ އެ ނިންމުމަކީ، ދީނީ އަޅުކަން އަދާކުރުމުގެ މިނިވަންކަމަށް ހުރަސްއަޅައި، މުސްލިމުންނަށް އަދަބިދިނުމުގެ އަމަލެއް ކަމަށްވެސް ބުނަމުން ގެންދިޔައެވެ.
އަގްސާ މިސްކިތް މުސްލިމުންނަށް ބަންދު ކޮށްފައި އޮތްއިރުވެސް، އަގްސާ މިސްކިތުގެ ހަރިންމަ ތެރެއަށް ޔަހޫދީން ވައްދައި އެމީހުންގެ އަޅުކަންތައް ފުރިހަމަ ކުރުމުގެ ފުރުސަތު އިސްރާއީލުން ދީފައި ވެއެވެ. މިސްކިތް ސަރަހައްދުގެ ހުރުމަތް ކަނޑައި، އިސްރާއީލުގެ މުޖުރިމުން އެ ސަރަހައްދުތަކަށް ވަދެފައި ވެއެވެ.