އިސްރާއީލާއި އީރާނުން ހަނގުރާމަ ހުއްޓާލުމަށް އެއްބަސްވެފައިވާ ކަމަށާއި، އެކަމުގެ ސަބަބުން އެންމެ ފަހުން ހަނގުރާމަ ނިމުމަކަށް އަންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޖޫން މަހުގެ 13 ވަނަ ދުވަހު އިސްރާއީލުން ކުއްލި ގޮތަކަށް އީރާނަށް ދިން ވައިގެ ހަމަލާތައް އަމާޒުކުރެވުނީ އީރާންގެ ބައެއް ނިއުކްލިއާ ފެސިލިޓީތަކާއި، އަސްކަރީ މަރުކަޒުތަކަށާއި، އީރާންގެ އަސްކަރިއްޔާގެ އިސްވެރިން ދިރިއުޅުއްވާ އިމާރާތްތަކާއި ގެތަކަށެވެ.

މި ހަމަލާތަކުގައި އީރާންގެ އަސްކަރިއްޔާގެ އިސްވެރިންތަކެއް ވަނީ ޝަހީދުވެފައެވެ. މި ހަމަލާތަކަށް ފަހު، އީރާނާއި އިސްރާއީލާ ދެމެދު ހަނގުރާމަ ފެށިގެން އުޅޭތާ ދެވަނަ ހަފްތާއަށް އެޅިފައިވާ އިރު، ދެ ޤައުމުގެ ދެމެދުގައި ކުރިއަށްދާ ހަނގުރާމަ ހުއްޓާލާނެ ކަމުގެ އަލާމާތެއް އަދި ފެންނާކަށް ނެތެވެ.

ދެ ޤައުމުގެ ދެމެދުގައި ހަނގުރާމަ ކުރިއަށްދަނިކޮށް އެމެރިކާއިން ވަނީ ހަނގުރާމައިގެ ތެރެއަށް ވަދެފައެވެ. އެމެރިކާގެ މަތިންދާ ބޯޓުތަކުން އީރާންގެ ވައިގެ ސަރަޙައްދުތަކަށް ވަދެ ހަމަލާތައް ދިނީ އީރާންގެ ނިއުކްލިއާ ފެސިލިޓީތައް ހުންނަ ސަރަޙައްދުތަކަށެވެ.

މީގެ ފަހުން އީރާނުން ރޭ ވަނީ ޤަޠަރުގެ އަލް އުދައިދުގައި އެމެރިކާއިން ހިންގާ ކޯލިޝަން އެއަރ އޮޕަރޭޝަންސް ސެންޓަރަށް މިސައިލް ހަމަލާއެއް ދީފައެވެ.

މި ހަމަލާގެ ފަހުން ރޭ ޓްރަމްޕްގެ ފަރާތުން ނެރުނު ބަޔާނެއްގައި ވިދާޅުވެފައިވަނީ ހުރިހާ ކަމެއް ވެސް ހިނގަންޖެހޭނީ އެ ޤައުމަކުން ކުރަންޖެހޭ ގޮތަށް ކަމަށް ބަލައިގެން ކަމަށެވެ. އަދި އިސްރާއީލާއި އީރާނަށް މަރުޙަބާ ދަންނަވަން ބޭނުންވަނީ ހަނގުރާމައިގެ ކަންކަން ނިންމުމަށް ސްޓެމިނާއާއި ހިތްވަރާއި އިންޓެލިޖެންސް ދެއްކި ކަމަށްޓަކައި ކަމަށް އެމަނިކުފާނު ވިދާޅުވެފައިވެއެވެ.

“މިއީ އެތައް އަހަރެއް ވަންދެން ދެމިގެން ގޮސް މުޅި މެދުއިރުމަތި ހަލާކުކޮށްލެވިދާނެ ހަނގުރާމައެއް، އެކަމަކު އެކަން ނުވި، އަދި ދުވަހަކުވެސް ނުވާނެ،” ޓްރަމްޕް .

ޓްރަމްޕް ވިދާޅުވީ 24 ގަޑިއިރުގެ ތެރޭގައި ހަނގުރާމަ ހުއްޓާލުމުގެ މަސައްކަތް މުޅިން ތަންފީޒުކުރާނެ ކަމަށާއި އޭގެ ސަބަބުން “12 ދުވަހުގެ ހަނގުރާމަ ރަސްމީކޮށް ނިމުމަކަށް އަންނާނެ” ކަމަށެވެ.

“އީރާނުން ހަނގުރާމަ ހުއްޓާލަން ފަށާނެ، އަދި 12 ގަޑިއިރު ފަހުން އިސްރާއީލުން ހަނގުރާމަ ހުއްޓާލަން ފަށާނެ، 24 ގަޑިއިރުވުމުން ރަސްމީކޮށް ހަނގުރާމަ ނިމުމަކަށް އަންނާނެ،” .ޓްރަމްޕް

ރައީސް މިކަން އިޢުލާންކުރެއްވިތާ ކުޑައިރުކޮޅެއް ފަހުން ފޮކްސް ނިއުސްއަށް ދެއްވި އިންޓަވިއުއެއްގައި ނައިބު ރައީސް ޖޭޑީ ވެންސް ވަނީ މި އެއްބަސްވުން ކާމިޔާބުކަމާއެކު ނިންމެވި ކަމަށްޓަކައި ޓްރަމްޕަށް ތަޢުރީފުކުރައްވާފައެވެ.

“އަޅުގަނޑު މިތަނަށް އަންނަން ވައިޓް ހައުސްއިން ނުކުތްއިރުވެސް ޙަޤީޤަތުގައި އަޅުގަނޑުމެން މަސައްކަތްކުރަމުން ދިޔައީ އެކަމަށް. އެހެންވީމާ މިއީ އުފާވެރި ޚަބަރެއް، ރައީސް އެކަން ފައިނަލްކުރެއްވީ،” ވެންސް ވިދާޅުވިއެވެ.

ޓްރަމްޕް މިގޮތަށް އިޢުލާންކުރެއްވި ނަމަވެސް، އީރާނާއި އިސްރާއީލުން މިކަމާ ގުޅޭގޮތުން އެއްވެސް އެއްޗެއް ހާމަކުރައްވާފައެއް ނުވެއެވެ.

އީރާނާއި އިސްރާއީލާ ދެމެދު ކުރިއަށްދިޔަ ހަނގުރާމައާ ގުޅިގެން އީރާނުން 500 އާ ގާތްކުރާ އަދަދަކަށް މީހުން ވަނީ ޝަހީދުކޮށްފައެވެ. އަދި އިސްރާއީލުން 24 މީހަކު މަރާލި އިރު، ދެ ޤައުމުން ވެސް ގިނަ އަދަދެއްގެ ބަޔަކު ވަނީ ޒަޚަމްވެފައެވެ.

މި ހަނގުރާމައިގެ ސަބަބުން ބައިނަލްއަޤްވާމީ މުޖުތަމަޢުގެ ކަންބންބޮޑުވުން އިތުރުވެ، ދެ ޤައުމުގެ މެދުގައި ހިނގަމުންދާ ގެއްލުންތައް ހުއްޓުވުމަށް ގޮވާލާފައިވެއެވެ. އަދި މި ހަނގުރާމަ ހުއްޓުވުމަށް ދުނިޔޭގެ އެކި ޤައުމުތަކުން ދިޕްލޮމެޓިކް މަސައްކަތްތަކެއް ކުރަމުން ގެންދިޔައެވެ.

މި އެއްބަސްވުމަކީ މެދުއިރުމަތީގެ ސަރަޙައްދުގައި އޮމާންކަން ޤާއިމުކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. ނަމަވެސް، ދެ ޤައުމުގެ މެދުގައި އޮތް ދުރު ތާރީޚީ ދެކޮޅުވެރިކަމަށް ބަލާއިރު، މި އެއްބަސްވުން ދެމެހެއްޓުމަކީ ގޮންޖެހުންތަކެއް ހުރި ކަމެއް ކަމަށް ސިޔާސީ ތަޙުލީލުކުރާ ފަރާތްތަކުން ދެކެއެވެ.

ބައިނަލްއަޤްވާމީ މުޖުތަމަޢުން މިހާރު އެދެނީ ދެ ޤައުމުން މި އެއްބަސްވުމަށް އިޙްތިރާމްކޮށް، ދެމެހެއްޓެނިވި ސުލްޙައަކަށް މަގުފަހިކުރުމެވެ. އަދި މުސްތަޤުބަލުގައި މިފަދަ ހަނގުރާމަތައް ހުއްޓުވުމަށްޓަކައި ދެ ޤައުމުގެ މެދުގައި ދެމެހެއްޓެނިވި ޑައިލޮގެއް ޤާއިމުކުރުމަށް ގޮވާލަމުންދެއެވެ.