ރަޝިޔާގެ ރައީސް ވްލަދިމީރު ޕޫޓިން ވިދާޅުވެފައިވާ ގޮތުގައި، އިސްރާއީލުން އީރާނަށް ހަމަލާދޭން ފަށާފައިވަނީ، އީރާނުން ނިއުކްލިއަރ ހަތިޔާރު އުފެއްދުމުގެ އެއްވެސް ހެއްކެއް ނެތްކަމަށް ރަޝިޔާއިން ތަކުރާރުކޮށް އަންގަމުން ދިޔަ ނަމަވެސްމެވެ.
ޕޫޓިން އިތުރަށް ވިދާޅުވެފައިވާ ގޮތުގައި، ރަޝިޔާގެ އިތުރުން ބައިނަލްއަޤްވާމީ އެޓޮމިކް އެނަރޖީ އޭޖެންސީ (އައިއޭއީއޭ) އަށްވެސް އީރާނުން ނިއުކްލިއަރ ހަތިޔާރު އުފެއްދުމަށް މަސައްކަތްކުރަމުންދާކަމުގެ އެއްވެސް ހެއްކެއް ލިބިފައެއް ނުވެއެވެ. އަދި މިކަން އިސްރާއީލުގެ އިސްވެރިންނަށް ތަކުރާރުކޮށް އަންގަމުން ގެންދިޔަކަމަށް ޕޫޓިން ވިދާޅުވެފައިވެއެވެ.
އީރާނަށްވެސް ސުލްހަވެރި ބޭނުންތަކަށް ނިއުކްލިއަރ ހަކަތަ އުފެއްދުމުގެ ހައްޤު ލިބިގެންވާކަމަށް ޤަބޫލުކުރައްވާ ކަމަށާއި، މިކަމުގައި ރަޝިޔާއިން ފުރިހަމަ އެއްބާރުލުން ދޭން ތައްޔާރަށް ތިބިކަމަށްވެސް ޕޫޓިން ވިދާޅުވެފައިވެއެވެ. މީގެ އިތުރުން، އީރާނާއި އިސްރާއީލާ ދެމެދު ހިނގަމުންދާ ހަނގުރާމައިގެ ލޭއޮހޮރުވުން ހުއްޓުވުމަށް ރަޝިޔާއިން ދެފަރާތަށްވެސް ހުށަހެޅުންތަކެއް ހުށަހަޅާފައިވާކަމަށް ޕޫޓިން ވިދާޅުވެފައިވެއެވެ. ނަމަވެސް، މި ހުށަހެޅުންތަކުގެ ތަފްސީލު ހާމަކުރައްވާފައެއް ނުވެއެވެ.
ޖޫން 13 ވަނަ ދުވަހު އިސްރާއީލުން އީރާނަށް ހަމަލާދޭން ފެށުމާއެކު، އީރާނުންވެސް ބެލިސްޓިކް މިސައިލްތަކާއި އަސްކަރީ ޑްރޯންތައް ބޭނުންކޮށްގެން އިސްރާއީލަށް ޖަވާބުދާރީވަމުން ގެންދެއެވެ.
އިސްރާއީލުގެ ހަމަލާތަކުގައި މިހާތަނަށް 722 މީހުން ޝަހީދުވެފައިވާއިރު، 2,546 މީހުން ޒަޚަމްވެފައިވެއެވެ. އަނެއްކޮޅުން، އީރާނުގެ ހަމަލާތަކުގައި އިސްރާއީލުގެ 24 މީހުން މަރުވެ، ގިނަ އަދަދެއްގެ މީހުން ޒަޚަމްވެފައިވާކަމަށް ރިޕޯޓުކުރެވެއެވެ.
ކިޔުންތެރިންގެ ހިޔާލު