އިސްރާއީލުގައި އަލް ޖަޒީރާ ޓީވީ ބަލާ އެންމެނާމެދު ފިޔަވަޅު އެޅުމަށް، އިސްރާއީލުގެ ނޭޝަނަލް ސެކިއުރިޓީ މިނިސްޓަރ ބެން ގްވީރް ފުލުހުންނަށް އަމުރުކޮށްފިއެވެ.
މީޑިއާއަށް ދިން ބަޔާނެއްގައި ބެން ގްވީރް ވަނީ، އަލް ޖަޒީރާ ޓީވީ ބަލާ މީހުންގެ މައްސަލަ ފުލުހުންނަށް ރިޕޯޓް ކުރުމަށް އާންމުންގެ ކިބައިންވެސް އެދިފައެވެ.
ޣައްޒާގައި އިސްރާއީލު ސިފައިން ހިންގާ ލާއިންސާނީ ޖަރީމާތަކުގެ ރިޕޯޓްތައް، އަޑާއި މަންޒަރާއެކު ގެނެސްދޭތީ އިސްރާއީލުގައި ހުރި އަލް ޖަޒީރާގެ އޮފީސް ބަންދުކޮށް، އަލް ޖަޒީރާ އިސްރާއީލުންވެސް ބޭރުކޮށްލީ 2024 ވަނަ އަހަރުގެ މެއިމަހުއެވެ. އަދި އަލް ޖަޒީރާގެ ރިޕޯޓަރުންނާއި، ޕްރޮޑިއުސަރުނާއި، ކެމެރާމަނުންނާއި، އެހެން މުވައްޒަފުންވެސް އިސްރާއީލުން ބޭރުކޮށްލިއެވެ.
އަދި އޭގެފަހުން، ފަލަސްތީނު ސަރުކާރަށް މަޖުބޫރުކޮށްގެން ހުޅަނގު އައްސޭރިންވެސް އަލް ޖަޒީރާ ބޭރުކޮށްލިއެވެ. ފަލަސްތީނު ސަރުކާރުން އަލް ޖަޒީރާ މަނާކުރީ ޖެނުއަރީމަހުއެވެ.
އަލް ޖަޒީރާގެ ޓީމުތައް އިސްރާއީލުގައި މަސައްކަތް ކުރުމާ ގުޅޭގޮތުން ބެން ގްވީރްގެ ބަޔާނުގައި ބުނެފައިވަނީ، އަލް ޖަޒީރާއަށް ހުއްދަ ދެންވެސް ހުއްދަ ނުދޭނޭ ކަމަށެވެ. އަލް ޖަޒީރާއަކީ އިސްރާއީލުގެ ގައުމީ ސަލާމަތަށް ހުރި ނުރައްކަލެއް ކަމަށްވެސް އޭނާ ބުނެފައި ވެއެވެ.
އިސްރާއީލުން އަލް ޖަޒީރާއާ ދެކޮޅުވީ، ފަލަސްތީނުގެ ރަށްތަކުގައި ހިންގާ ޖަރީމާތައް ދުނިޔެއަށް ހާމަކޮށް އިސްރާއީލުން ހަދާ ދޮގުތައް ބޭޒާރުކުރާތީއެވެ.
އަލް ޖަޒީރާގެ ތަހްގީގީ އަދި ސިއްރު ރިޕޯޓްތަކުން، ޣައްޒާ ހަނގުރާމައިގައި ހިންގާފައިވާ ބޮޑެތި ޖަރީމާތަކާ ގުޅޭގޮތުން އިސްރާއީލު ސިފައިން ހަދާފައިވާ ބޮޑެތި ދޮގުތައް ފަޅާއަރުވާލާފައި ވެއެވެ.
ޣައްޒާ ހަނގުރާމައިގެ ލައިވް ކަވަރޭޖް ގެނެސްދިނުމުގައި އަލް ޖަޒީރާ އިންގްލިޝް އަދި އަލް ޖަޒީރާ އަރަބިކް އިން ކުރާ މަސައްކަތުން، ހަނގުރާމައިގެ ޚަބަރުތައް ބެލުމުގައި ދުނިޔޭގެ ގިނަ ބަޔަކު ބަލައި އަދި އިތުބާރުވެސް ކުރަނީ އަލް ޖަޒީރާއަށެވެ.
އިސްރާއީލުގެ ހުރަސްއެޅުންތަކާ އެކުވެސް އަލް ޖަޒީރާއިން ހަނގުރާމައިގެ ޚަބަރުތައް ގެނެސްދިނުމުގައި ފަހަތަކަށް ނުޖެހެއެވެ.
ކިޔުންތެރިންގެ ހިޔާލު