މާލެ ސިޓީގެ މަގުތަކަށް އުކާފައި ހުންނަ ކުނި ނަގައި، އެ ކުނި އުކާލުމަށް، އަހަރަކު 60 މިލިޔަން ރުފިޔާ ޚަރަދުވާ ކަމަށް މާލެ ސިޓީ ކައުންސިލްގެ ހިސާބުތަކުން ދައްކައިފިއެވެ.
މާލެ ސިޓީގެ މޭޔަރ އާދަމް ޢާޒިމް ވިދާޅުވީ، މާލެސިޓީގައި ދިރިއުޅުއްވާ ބޭފުޅުންނަށް، ރީތި، ސާފު މާލެއެއް ހޯދައި ދިނުމަށް، މާލެ ސިޓީ ކައުންސިލްގެ މުވައްޒަފުން ކުރަމުން އަންނަ މަސައްކަތްތަކަށް އެއްބާރުލުންދީ، މާލެސިޓީގެ މަގުތަކަށް އެއްވެސް ފަރާތަކުން ކުނި ނޭޅުމަށް އިލްތިމާސް ކުރައްވާ ކަމަށެވެ.
މާލެ ސިޓީގެ މަގުތަކުން މިހާރުވެސް ދުވާލަކަށް، 30 ޓަނުގެ ކުނި ނަގާ ކަމަށް އާޒިމް ވަނީ ވިދާޅުވެފައެވެ.
”މާލޭގެ މަގުތަކުގައި ހުންނަ ގަސްބުޑުތަކަށާއި އެކި ބޭނުންތަކުގައި މަގު ފާރުތަކުގައި ހަރުކޮށްފައި ހުންނަ، ފޮށިތަކުގެ މަތީގައި، ކުނި ބަހައްޓާފައި ހުންނަކަން ވަރަށް ބޮޑަށް ފާހަގަ ކުރެވޭ، އެ ކަންކަން އެ ގޮތަށް ނުކުރުމަށް، މާލޭގައި ދިރިއުޅޭ ހުރިހާ ރައްޔިތުންގެ ކިބައިން ވަރަށް އާދޭހާއެކު އެދެން“ އާޒިމް ވިދާޅުވެފައި ވެއެވެ.
މޭޔަރު ޢާޒިމް ވަނީ މަގުތަކަށް ކުނި އެޅުމުގެ ބަދަލުގައި، ކުނި އަޅަން ހުންނަ ޑަސްބިންތަކަށް ކުނި އެޅުމަށް، ހުރިހައި ރައްޔިތުން ވެސް އާދަކަކަށް ހެއްދެވުމަށް އެދިވަޑައިގެންފައެވެ.
ކިޔުންތެރިންގެ ހިޔާލު