އިންސާނީ އެހީ ބެހުމުގެ ނަމުގައި އާންމުން މަރާ މައްސަލައިގެ މިނިވަން ތަހްގީގެއް ހިންގަން އދގެ ސެކްރެޓަރީ ޖެނެރަލް އެންޓޯނިއޯ ގުޓިއަރޭޒް ގޮވާލައްވައިފިއެވެ.
އދގެ ސެކްރެޓަރީ ޖެނެރަލް މިކަމަށް ގޮވާ މިލެއްވީ، އެމެރިކާގެ ގާޒާ ހިއުމެނިޓޭރިއަން ފައުންޑޭޝަނުން، ނިމުނު މެއިމަހުގެ 27 ވަނަ ދުވަހުން ފެށިގެން، އެހީ ބަހާ ހުރިހާ ސަރަހައްދުތަކުގައި ކޮންމެ ދުވަހަކު މީހުންގެ ގަޔަށް ބަޑިޖަހައި މަރަމުންދާ މައްސަލައިގައެވެ.
ރަފަހްގައި އެހީ ބަހާ ސައިޓްގައި މިއަދުވެސް ވަނީ 27 މީހެއްގެ ގަޔަށް ބަޑިޖަހައި ޝަހީދުކޮށްލާފައެވެ. އޭގެ ދެދުވަސްކުރިން 35 މީހެއްގެ ގަޔަށް ބަޑިޖަހައި ޝަހީދުކޮށްލާފައި ވެއެވެ.
އަދި ވޭތުވެދިޔަ 8 ދުވަހުގެ ތެރޭގައި، އިންސާނީ އެހީ ބަހާ ޕޮއިންޓްތަކުގައި ޒަޔަނިސްޓު ސިފައިން ބަޑިޖަހައި ޝަހީދުކޮށްލި މީހުންގެ އަދަދު މިހާރުވަނީ 102 އަށް އަރާފައެވެ. ޒަޚަމްކޮށްލި މީހުންގެ އަދަދު 400 އިން މައްޗަށް އަރާފައި ވެއެވެ.
އދގެ ސެކްރެޓަރީ ޖެނެރަލް އެންޓޯނިއޯ ގުޓިއަރޭޒް ނެރުއްވި ބަޔާނެއްގައި ވިދާޅުވީ، އެހީ ހޯދަން ގޮސްތިބޭ މީހުންގެ ގަޔަށް ބަޑިޖެހުމުގެ ސަބަބުން ކޮންމެ ދުވަހަކު އެތައް ބަޔަކު މަރުވެ، އެތައްބަޔަކު ޒަޚަމްވަމުން ދިއުމަކީ ނުހަނު ކަންބޮޑުވާ ކަމެއް ކަމަށެވެ.
ގުޓިއަރޭޒް ވަނީ، މިކަންކަން އަވަސް އަދި މިނިވަންގޮތެއްގައި ތަހުގީގުކޮށް، ކުށްވެރިން ޖަވާބުދާރީ ކުރުވުމަށް ގޮވާލައްވާފައެވެ.
އިންސާނީ އެހީ ހޯދަން ގޮސްތިބޭ ޣައްޒާގެ އާންމުންގެ ގަޔަށް ޒަޔަނިސްޓުން ބަޑިޖަހައި މަރަމުންދާ މައްސަލާގައި އދގެ އިންސާނީ ހައްގުތަކާބެހޭ ވެރިޔާވެސް ވަނީ ވަރަށް ބޮޑަށް ނުރުހުން ފާޅުކުރައްވާފައެވެ.
ކިޔުންތެރިންގެ ހިޔާލު