އެމެރިކާއާއި އިސްރާއީލުން ހުއްދަ ދީގެން ޣައްޒާގައި ބަހަމުންދާ އިންސާނީ އެހީ ހޯދަން ގޮސް އުޅުނު މީހުންގެ ތެރެއިން، އިސްރާއީލުން މިހާތަނަށް 10 މީހެއްގެ ގަޔަށް ބަޑިޖަހައި މަރާލާފައިވާ ކަމަށް ޣައްޒާ މީޑިއާ އޮފީހުން ބުނެއެވެ.

ޣައްޒާ މީޑިއާ އޮފީހުން ނެރުނު ބަޔާނެއްގައި ބުނެފައިވަނީ، އިންސާނީ އެހީގެ ގޮތުގައި ބަހާ ސާމާނު ހޯދުމަށް އެމީހުން ބުނި ތަންތަނަށްގޮސް ތިބި މީހުންގެ ތެރެއަށް ބަޑިޖަހައި ވޭތުވެދިޔަ 48 ގަޑިއިރުގެ ތެރޭގައި 10 މީހުން މަރާލާފައިވާ ކަމަށާއި، ބަޑިޖެހުމުގެ ސަބަބުން 62 މީހުން ޒަޚަމްވެފައިވާ ކަމަށެވެ.

ޣައްޒާ މީޑިއާ އޮފީހުން ބުނީ، އެއީ ބަނޑުހައިހޫނުކަމުގައި ތިބި އާންމުން ކަމަށާއި، ކާނޭ އެއްޗެއް ހޯދަން ގޮސްތިބި މީހުން ކަމަށެވެ.

އެމެރިކާއާއި އިސްރާއީލުން ޣައްޒާގައި އިންސާނީ އެހީ ބަހަން ހުއްދަ ދީގެން އުޅެނީ “ގާޒާ ހިއުމަނިޓޭރިއަން ފައުންޑޭޝަން” ނަމަކަށްކިޔާ ޖަމާއަތަކަށެވެ.

އެ ޖަމާއަތުން އިންސާނީ އެހީ ބަހަން، ރަފަހްގައި ޖެހި ޑިސްޓްރިބިއުޝަން ޕޮއިންޓަށް ބަނޑުހައި ވެފައިތިބި އެތައްހާސް އާންމުން ޖަމާވެ އެހީ ހޯދަން އުޅުމުގެ ތެރޭގައި ކަންކަން ކޮންޓްރޯލުން ނެއްޓިގެން ދިޔައެވެ.

އާންމުން ކިޔޫގައި ޖެހުމަށް “ގާޒާ ހިއުމަނިޓޭރިއަން ފައުންޑޭޝަން” ހަދާފައި ހުރީ ކޮށިތަކެއްހެން ހުންނަ ލައިންތަކެވެ.

ޣައްޒާގެ އެތައް މިލިއަން މީހުން ބަނޑުހައިހޫނުކަމުގައި ތިބި އިރު، އިންސާނީ އެހީ މިގޮތަށް ބަހައިގެން ނުވާނޭ ކަމަށް އދއާއި، އިންސާނީ އެހީދޭ ބައިނަލްއަގްވާމީ ޖަމާއަތްތަކުން ގެންދިޔައީ ކުރިންވެސް އިންޒާރު ކުރަމުންނެވެ.

އޭގެ ބަދަލުގައި، ޣައްޒާއަށް އިންސާނީ އެހީ އެތެރެކޮށް ސަލާމަތާއި ރައްކާތެރިކަމުގައި ބެހުމުގެ މަސައްކަތް ކުރުމުގެ ހުއްދަ އިސްރާއީލުން އދއަށާއި، އިންސާނީ އެހީދޭ ޖަމާއަތްތަކަށް ދިނުމަށް ގެންދަނީ ގޮވާލަމުންނެވެ.

“ގާޒާ ހިއުމަނިޓޭރިއަން ފައުންޑޭޝަން” އިން އެހީ ބެހުމުގައި ހިނގާ ކަންކަން، އދއާއި، ބައިނަލްއަގްވާމީ އޭޖެންސީތަކުން މަސައްކަތް ކުރާއިރު ކުރިމަތި ނުވާނޭ ކަމަށް ބުނެއެވެ. ސަބަބެއް ކަމަށް ބުނެފައިވަނީ އެކަމުގައި އެތައް އަހަރެއްގެ ތަޖުރިބާ ހުރުމެވެ.

އެމެރިކާގެ ތާއީދު ދީފައިވާ “ގާޒާ ހިއުމަނިޓޭރިއަން ފައުންޑޭޝަން” އަށް ޣައްޒާގައި އިންސާނީ އެހީ ބެހުމުގެ މަސައްކަތް ކުރުމުގެ ހުއްދަ އިސްރާއީލުން ދިނުމުން ދުނިޔެ ގެންދިޔައީ އެކަމާ ދެކޮޅު ހަދަމުންނެވެ. އެއީ، އިސްރާއީލުގެ ނިޔަތް ރަނގަޅު ނޫންކަން އެނގޭތީއެވެ.

ފަލަސްތީނުން އދއަށް ކަނޑައަޅާފައި ހުންނަވާ އެމްބަސެޑަރ ވިދާޅުވީ، އިސްރާއީލުން އިންސާހީ އެހީ ހަނގުރާމައިގެ ހަތިޔާރެއްގެގޮތުގައި ބޭނުންކުރަމުން ގެންދާ ކަމަށެވެ.