ނ. އަތޮޅު ރިސޯޓެއްގެ ނެރު ކައިރީ ފީނަން އުޅުނު މީހެއްގެ ގައިމަތިން ލޯންޗެއް ގޮސް، އެ މީހާގެ އަތް ބުރިވެއްޖެއެވެ.
ރޭގެ ވަގުތެއްގައި ހިނގި އެ ހާދިސާގައި އަނިޔާވީ 30 އަހަރުގެ ބަންގުލަދޭޝް ފިރިހެނަކަށެވެ.
ފުލުހުން ބުނީ އަނިޔާވި ބިދޭސީ މީހާގެ އަތުގެ. އޮޅަނބޮއްޓާ ހިސާބުން ބުރިވެ، އަނިޔާތަކެއް ލިބިފައިވާ ކަމަށާއި އޭނާ މާލެ ގެނެސް، އޭޑީކޭ ހޮސްޕިޓަލުގައި ފަރުވާދެމުން އަންނަ ކަމަށެވެ.
ކަނޑުމަތީގައި އެފަދަ ހާދިސާތައް ހިނގާ އަދަދު އިތުރުވަމުންދާތީ، އެ މައްސަލަ ހައްލުކުރުމުގެ މަސައްކަތް ޓްރާންސްޕޯޓް މިނިސްޓްރީން އަންނަނީ ކުރަމުންނެވެ. އެގޮތުން އެކަމަށް ގަވާއިދު އިސްލާހުކުރައްވާނެ ކަމަށް މިނިސްޓަރު މުހައްމަދު އަމީން މީގެ ކުރިން ވިދާޅުވެފައިވެއެވެ.
