ލަންކާ ސަރުކާރުން ރާއްޖެއަށް ހަދިޔާކުރާ ހައިވަކަރު ގަސްތައް މީހުން ދިރިއުޅޭ ހުރިހާ ރަށެއްގައި އިންދުމަށް ހަމަޖެހިފައިވާ ކަމަށް މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމް ވިދާޅުވެއްޖެއެވެ.
ވަޒީރު މިހެން ވިދާޅުވީ ރޯޒްވުޑް ރަންފަރު ރިސޯޓުގައި 1.4 މިލިއަން ގަސް އިންދުމުގެ މަޝްރޫޢު ފެށުމަށް އިއްޔެ އެރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އެގޮތުން މިރަސްމިއްޔާތުގައި ވަޒީރު ވިދާޅުވީ، މިއީ ރައީސް ޑރ. މުހައްމަދު މުއިއްޒުގެ ތިމާވެށީގެ 1 ވައުދުފުޅު ކަމުގައިވާ 5 މިލިއަން ގަސް އިންދުމުގެ ޕްރޮގްރާމުގެ ދަށުން އެންވަޔަރްމެންޓް މިނިސްޓްރީގެ އެހީތެރިކަމާއެކު ފެށި ޕްރޮގްރާމެއް ކަމަށެވެ.
ހަމައެއާއެކު ވަޒީރު ވަނީ ރައީސްގެ 5 މިލިއަން ގަސް އިންދުމުގެ ޕްރޮގްރާމުގެ ދަށުން މިހާތަނަށް 5.2 މިލިއަން ގަސް އިންދުމުގެ އަހުދު ލިބިފައިވާކަން ހާމަ ކުރަށްވާފައެވެ. އަދި މި އަހަރުގެ ތިމާވެށީގެ ދުވަހާއި ގުޅުވައިގެން ސްރީލަންކާ ސަރުކާރުން ހަދިޔާ ކުރަށްވާ ހައިވަކަރު ގަސްތައް މީހުން ދިރިއުޅޭ ކޮންމެ ރަށަކާއި، ހުރިހާ ރިސޯޓަކަށް ހަދިޔާ ކުރަށްވަން ނިންމަވާފައިވާ ކަމަށް ވަޒީރު ވިދާޅުވިއެވެ.
އޭގެއިތުރުން ރާއްޖޭގެ ހުރިހާ ރަށެއްގައި ތިމާވެށީގެ ދުވަހުގެ ގަސް އިންދުމުގެ ހަރަކާތްތައް ބޭއްވުމަށް މަސައްކަތް ކުރައްވަމުންދާކަން ވަޒީރު ވަނީ ފާހަގަ ކުރަށްވާފައެވެ.
