ގައުމީ އެއާލައިން މޯލްޑިވިއަނުން މ. މުލީ އެއާޕޯޓަށް މިމަހުގެ 17 ގައި ދަތުރުތައް ފެށުމަށް ނިންމައިފިއެވެ.
މުލީ އެއާޕޯޓު ތަރައްގީކޮށް ނިންމައި، ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) އިން އެ އެއާޕޯޓު އާންމު ދަތުރުތަކަށް ހުޅުވާލާފައިވަނީ އިއްޔެއެވެ. އެގޮތުން ޑޮމެސްޓިކް އުދުހުންތައް އޮޕަރޭޓު ކުރާ މޯލްޑިވިއަން، ވިލާ އަދި މަންތާއަށް ފުރުސަތު ހުޅުވާލިއެވެ.
މޯލްޑިވިއަނުން ސޯޝަލް މީޑިއާގައި މިއަދު ކުރި ޕޯސްޓެއްގައި ބުނީ މިމަހުގެ 17 ގައި މާލެ އިން މުލީ އެއާޕޯޓަށް ދަތުރުތައް ފަށާނެ ކަމަށާއި އެއްކޮޅު ޓިކެއްޓެއްގެ އަގަކީ 1377 ރުފިޔާ ކަމަށެވެ.
މޯލްޑިވިއަނުން މިމަހު މުލީ އެއާޕޯޓަށް ދަތުރުތައް ފެށުމަށް ނިންމާފައިވަނީ ކޮންމެ ހޮނިހިރު ދުވަހަކު ދަތުރުތައް ކުރާގޮތަށެވެ. ކޮންމެ ހޮނިހިރު ދުވަހެއްގެ މެންދުރުފަހު 3:30 ގައި މާލެއިން ފުރާ އިރު، މުލިން ފުރުމަށް ހަމަޖެހިފައިވަނީ ހަވީރު 4:45 ގައެވެ.
މ. އަތޮޅުގެ ފުރަތަމަ އެއާޕޯޓު، މުލީ އެއާޕޯޓުގެ މަސައްކަތް ނިންމައި، މިދިޔަ މަހުގެ 25 ވަނަ ދުވަހު ޓެސްޓު ފުލައިޓު ވެސް ވަނީ ޖައްސައިފައެވެ. އެ އެއާޕޯޓަކީ 2021 ވަނަ އަހަރު އެމްޓީސީސީއާ ހަވާލުކޮށްގެން ތަރައްގީކުރަން ފެށި އެއާޕޯޓެކެވެ. އެ އެއާޕޯޓުގައި 1.5 ކިލޯމީޓަރުގެ ރަންވޭއެއް ހިމެނެއެވެ.
ކިޔުންތެރިންގެ ހިޔާލު