އިންޑިއާ ސަރުކާރުން އެކްސް ޕްލެޓްފޯމަށް 8،000 އަށްވުރެ ގިނަ އެކައުންޓް ބްލޮކްކުރުމަށް އަމުރުކޮށްފިއެވެ. މި އަމުރުގެ ދަށުން ބްލޮކްކުރެވޭ އެކައުންޓްތަކުގެ ތެރޭގައި ބައިނަލްއަޤްވާމީ ނޫސްވެރި ޖަމާޢަތްތަކާއި، އެކްސްގައި މަޝްހޫރު ބައެއް ބޭނުންކުރާ ފަރާތްތަކުގެ އެކައުންޓްތައް ހިމެނެއެވެ.
އިންޑިއާ ސަރުކާރުގެ ބަޔާނުގައި ވިދާޅުވެފައިވަނީ، މި އެކައުންޓްތަކުން އެކްސްގައި ޙަޤީޤަތް އޮޅުވާލުމަށް މަސައްކަތްކުރާ ކަމަށް ތުހުމަތުކުރެވޭތީ މި ފިޔަވަޅު އަޅަން ޖެހުނު ކަމަށެވެ. އަދި މި އަމުރާ އެއްގޮތަށް ޢަމަލު ނުކޮށްފިނަމަ، އެކްސްގެ އިންޑިއާގެ މުވައްޒަފުންނަށް ބޮޑެތި ޖޫރިމަނާތަކާއި ޖަލު ޙުކުމް ކުރިމަތިވެދާނެ ކަމަށް އިންޒާރު ދެއްވާފައިވެއެވެ.
މި މައްސަލައާ ގުޅޭގޮތުން އެކްސްގެ ފަރާތުން އަދި ރަސްމީ ބަޔާނެއް ނެރެފައެއް ނުވެއެވެ. ނަމަވެސް، ބައެއް ފަރާތްތަކުން މި ފިޔަވަޅު ދެކެނީ އިންޑިއާގައި ނޫސްވެރިކަމުގެ މިނިވަންކަމަށް އޮތް ނުރައްކަލެއްގެ ގޮތުގައެވެ.
މި ފިޔަވަޅާ ގުޅިގެން ބައިނަލްއަޤްވާމީ މުޖުތަމަޢުގެ ކަންބޮޑުވުން ފާޅުކުރަމުންދާއިރު، އިންޑިއާގައި ޚިޔާލު ފާޅުކުރުމުގެ މިނިވަންކަމަށް ކުރިމަތިވެދާނެ އަސަރުތަކާ މެދު ސުވާލު އުފެދެމުންދެއެވެ. މި މައްސަލައިގެ އިތުރު ތަފްސީލު ލިބުމުން އަޕްޑޭޓް ކުރެވޭނެއެވެ.
މީގެ ކުރިންވެސް އިންޑިއާ ސަރުކާރުން ސޯޝަލް މީޑިއާ ޕްލެޓްފޯމްތަކުގެ މައްޗަށް މިފަދަ ފިޔަވަޅުތައް އަޅާފައިވެއެވެ. 2021 ވަނަ އަހަރު، އިންޑިއާ ސަރުކާރުން ޓްވިޓަރ (މިހާރުގެ އެކްސް) އަށް 500 އަށްވުރެ ގިނަ އެކައުންޓް ބްލޮކްކުރުމަށް އަމުރުކުރިއެވެ. އޭރު އެ އަމުރު ނެރުނީ ޤައުމީ ސަލާމަތަށް ނުރައްކާވާ ފަދަ މަޢުލޫމާތު ފެތުރުމުގެ ތުހުމަތުގައެވެ.
އިންޑިއާގެ އައި.ޓީ ޤާނޫނުގެ ދަށުން، ސަރުކާރަށް މިފަދަ އަމުރުތައް ނެރުމުގެ ބާރު ލިބިދީފައިވެއެވެ. ނަމަވެސް، ބައިނަލްއަޤްވާމީ އިންސާނީ ޙައްޤުތަކުގެ ޖަމްޢިއްޔާތަކުން މި ޤާނޫނަށް ފާޑުކިޔަމުންދެއެވެ. އެ ފަރާތްތަކުން ބުނަނީ މި ޤާނޫނުގެ ސަބަބުން ޚިޔާލު ފާޅުކުރުމުގެ މިނިވަންކަމަށް ހުރަސްއެޅި، ސަރުކާރަށް ފާޑުކިޔާ ފަރާތްތަކުގެ އަޑު މަޑުކުރުމަށް މަގުފަހިވފަހިވާ ކަމަށެވެ.
ކިޔުންތެރިންގެ ހިޔާލު