އިންޑިއާއިން މިސައިލް ހަމަލާ ދިން ފަހުން ވައިގެ ތެރޭގައި އިންޑިއާ އާއި ޕާކިސްތާނުގެ މަތިންދާބޯޓުތަކުން ބަދަލުކުރި ހަމަލާތަކަކީ މި ފަހުގެ ތާރީހެއްގައި ދުނިޔޭގައި ވައިގެ ތެރޭގައި ކުރި އެންމެ ބޮޑު ހަނގުރާމަ ކަމަށް ޕާކިސްތާނުގެ އަސްކަރިއްޔާގެ އިސް އޮފިޝަލަކުު ވިދާޅުވެފައިވާއިރު މިހަގުރާމަ މި ދެ ޤައުމުގެ ދެމެދުގައި އިތުރަށް ވަރުގަދަވެ ފެށިއްޖެނަމަ، އޭގެ އަސަރު ރާއްޖެއަށްވެސް ކުރާނެކަން ޔަޤީނެވެ. އެފަދަ ހާލަތެއްގައި ރާއްޖެއަށް ކުރާނެ އަސަރުތަކައި ބެހޭގޮތުން ފުންކޮށް ވިސްނަންޖެހެއެވެ.
އިންޑިއާ އާއި ޕާކިސްތާނުގެ ދެމެދުގައި ހަނގުރާމައެއް ފެށިއްޖެނަމަ، ރާއްޖޭގެ އިޤްތިޞާދަށް ވަރަށް ބޮޑު އަސަރެއް ކުރާނެއެވެ. ރާއްޖެއަށް އެތެރެކުރާ ގިނަ މުދާތަކަކީ އިންޑިއާއިން އެތެރެކުރާ މުދާތަކެވެ. ހަނގުރާމައިގެ ސަބަބުން މި މުދާތައް އެތެރެކުރުމަށް ދަތިތަކެއް ކުރިމަތިވެ، މުދަލުގެ އަގު އުފުލި، ރާއްޖޭގައި ތަކެތީގެ ދަތިކަން ކުރިމަތިވެދާނެއެވެ.
ފަތުރުވެރިކަމުގެ ދާއިރާއަށްވެސް ނޭދެވޭ އަސަރުތަކެއް ކުރާނެއެވެ. ރާއްޖެއަށް އަންނަ ގިނަ ފަތުރުވެރިންނަކީ އިންޑިއާ މެދުވެރިކޮށް އަންނަ ފަތުރުވެރިންނެވެ. ހަނގުރާމައިގެ ސަބަބުން މި ސަރަޙައްދުގެ ވައިގެ ދަތުރުފަތުރަށް ހުރަސްތަކެއް އެޅި، ފަތުރުވެރިންގެ އަދަދު މަދުވެ، ރާއްޖޭގެ އިޤްތިޞާދަށް އިތުރު ގެއްލުންތަކެއް ލިބިދާނެއެވެ.
ރާއްޖޭގެ ސަލާމަތާއި ރައްކާތެރިކަމަށްވެސް ނުރައްކާތަކެއް ކުރިމަތިވެދާނެއެވެ. އިންޑިއާ އާއި ޕާކިސްތާނަކީ ނިއުކްލިއަރ ހަތިޔާރު އޮތް ދެ ޤައުމެވެ. މި ދެ ޤައުމުގެ ދެމެދުގައި ހިނގާ ހަނގުރާމައެއްގައި މިފަދަ ހަތިޔާރު ބޭނުންކޮށްފިނަމަ، އޭގެ ނޭދެވޭ އަސަރު ރާއްޖެއަށްވެސް ކުރުމަކީ އެކަށީގެންވާ ކަމެކެވެ.
ރާއްޖޭގެ ޞިއްޙީ ދާއިރާއަށްވެސް ބޮޑެތި ގޮންޖެހުންތަކެއް ކުރިމަތިވެދާނެއެވެ. ރާއްޖޭގައި ބޭނުންކުރާ ގިނަ ބޭސްތަކަކީ އިންޑިއާއިން އެތެރެކުރާ ބޭސްތަކެވެ. ހަނގުރާމައިގެ ސަބަބުން މި ބޭސްތައް އެތެރެކުރުމަށް ދަތިވެ، ބޭހުގެ ދަތިކަން ކުރިމަތިވެދާނެއެވެ.
ރާއްޖޭގެ ތަޢުލީމީ ދާއިރާއަށްވެސް އަސަރުކުރާނެއެވެ. ރާއްޖެއިން ގިނަ ދަރިވަރުން މަތީ ތަޢުލީމު ޙާޞިލުކުރަމުންދަނީ އިންޑިއާގައެވެ. ހަނގުރާމައިގެ ސަބަބުން މި ދަރިވަރުންނަށް އެ ޤައުމުގައި ކިޔެވުމަށް ދަތިވެ، އެ ދަރިވަރުންގެ ތަޢުލީމީ މުސްތަޤުބަލަށް ހުރަސްތަކެއް ކުރިމަތިވެދާނެއެވެ.
އެހެންކަމުން އިންޑިއާ އާއި ޕާކިސްތާނުގެ ދެމެދުގައި ހަނގުރާމައެއް ފެށިއްޖެނަމަ، އޭގެ އަސަރު ރާއްޖެއަށް ނުކުރާނެ ދާއިރާއެއް ނޯންނާނެއެވެ. އިޤްތިޞާދީ، އިޖްތިމާޢީ، ސިޔާސީ އަދި ތަރައްޤީގެ ހުރިހާ ދާއިރާއަކަށްވެސް ނޭދެވޭ އަސަރުތަކެއް ކުރާނެއެވެ. އެހެންވީއިރު، މި ދެ ޤައުމުގެ ދެމެދުގައި އޮންނަ ގުޅުން ރަނގަޅުވެ، ސުލްޙަވެރިކަން ދެމެހެއްޓުމަކީ ރާއްޖެއަށްވެސް ވަރަށް މުހިންމު ކަމެކެވެ.
ރާއްޖެއިން ވާންޖެހޭނީ މި ދެ ޤައުމުގެ ދެމެދުގައި އޮންނަ ގުޅުން ރަނގަޅުކުރުމަށް މަސައްކަތްކުރާ ފަރާތަކަށެވެ. އަދި ހަމައެއާއެކު، ރާއްޖޭގެ އަމިއްލަ މަޞްލަޙަތު ރައްކާތެރިކުރުމަށްޓަކައި، އެހެން ޤައުމުތަކާއެކު ގުޅުން ބަދަހިކޮށް، އިޤްތިޞާދީ ގޮތުން އެހެން ޤައުމުތަކަށް ބަރޯސާވުން ކުޑަކުރުމަށް މަސައްކަތްކުރަންޖެހެއެވެ. މިގޮތުން، ރާއްޖޭގެ އަމިއްލަ އުފެއްދުންތެރިކަން އިތުރުކޮށް، ތަފާތު ޤައުމުތަކާއެކު ވިޔަފާރީގެ ގުޅުން ޤާއިމުކުރުމަކީ މުހިންމު ކަމެކެވެ.
ވިސްނަންޖެހޭ ކަމަކީ އިންޑިއާ އާއި ޕާކިސްތާނުގެ ދެމެދުގައި ހަނގުރާމައެއް ފެށުމަކީ ހަމައެކަނި އެ ދެ ޤައުމަށް އެކަނި ނޫން، މުޅި ސަރަޙައްދަށް، ޚާއްޞަކޮށް ރާއްޖެ ފަދަ ކުދި ޤައުމުތަކަށް ވަރަށް ބޮޑެތި ގެއްލުންތަކެއް ލިބިދާނެ ކަމެއްކަމެވެ. އެހެންކަމުން، މި ދެ ޤައުމުގެ ދެމެދުގައި އޮންނަ ގުޅުން ރަނގަޅުކޮށް، ސުލްޙަވެރިކަން ދެމެހެއްޓުމަށް ބައިނަލްއަޤްވާމީ މުޖުތަމަޢުން މަސައްކަތްކުރުމަކީ ވަރަށް މުހިންމު ކަމެކެވެ.
