ޔަމަނުން ދީފާނޭ ރައްދު ހަމަލާއަކަށް މުޅި އިސްރާއީލު ކުއްލި ހާލަތަށް ގެނެސްފިއެވެ. އެގޮތުން، އިސްރާއީލުގެ ހުރިހާ ބޯޑަރުތަކެއްގައި ސަލާމަތީ ފިޔަވަޅު ވަރުގަދަކޮށް އަދި ވައިގެ ސަރަހައްދާއި، ކަނޑުގެ ސަރަހައްދުގެ ސަލާމަތީ ލެވެލްވެސް މިހާރުވަނީ އެންމެ މަތިކޮށްފައެވެ.
އިސްރާއީލުން ކުއްލި ހާލަތު މި ހިންގީ، ރޭގައި މުޅި ޔަމަނަށް ބޮން އެޅުމަށްފަހު، ޔަމަނުގެ ފަރާތުން ރައްދު ހަމަލާތަކެއް އަންނާނެކަން ކަށަވަރުވާތީއެވެ.
ޔަމަނުގެ އަސްކަރިއްޔާއިން ވަނީ އެކަމުގެ އިންޒާރުވެސް ދީފައެވެ. އަދި އިސްރާއީލަށް ހަމަލާ ދިނުމަށް ބޭނުންކުރާނެ، ދުނިޔޭގެ އެންމެ އެޑްވާންސް މިސައިލްތައްވެސް ދައްކާލާފައި ވެއެވެ.
އެގޮތުން، އިސްރާއީލުގެ އެންމެ މުހިންމު އަދި އެންމެ ވަރުގަދައަށް ހިމާޔަތް ކޮށްފައިވާ ތަންތަނަށް މި ފަހަރު ހަމަލާދޭނޭ ކަމަށާއި، މިފަހަރު ދޭ ހަމަލާތައް ވެގެންދަނީ ޒަޔަނިސްޓުންނަށް “ވޭންދެނިވި” ހަމަލާތަކަށް ކަމަށްވެސް ބުނެފައި ވެއެވެ.
އިސްރާއީލު ސިފައިން ޔަމަނުގެ އޮއިލް ޕޯޓްތަކާއި، އެއަރޕޯޓްތަކާއި، ސިފައިންގެ ބޭސްތަކަށް ސާޅީހަށްވުރެ ގިނަ ވައިގެ ހަމަލާތައް ދީފައި ވެއެވެ. އިސްރާއީލުގެ ހަމަލާތައް އައީ އެމެރިކާ ސިފައިން ޔަމަނުގެ ވެރިރަށަށް ވަރުގަދައަށް ބޮންއެޅިތާ މާ ގިނައިރެއް ނުވަނީހެވެ.
އެމެރިކާ، އިނގިރޭސި ސިފައިންގެ ކޯޑިނޭޝަންގެ ދަށުން އިސްރާއީލުން ޔަމަނަށް ހަމަލާތައް ދިނުމަށް މިސައިލާއި ބޮން ބޭނުންކޮށްފައި ވެއެވެ. ހަމަލާތައް މައިގަނޑުގޮތެއްގައި އަމާޒުކުރީ ހުދައިދާ ސިޓީއަށާއި، ބަޖިލް ސިމެންތި ފެކްޓަރީއަށެވެ.
މި ހަމަލާތަކުގައި މަރުވި އަދި ޒަޚަމްވި މީހުންގެ ފުރިހަމަ އަދަދުތަކެއް އަދި ހާމަކޮށްފައެއް ނުވެއެވެ. ޔަމަނަށް ހަމަލާދިނުމަށް އިސްރާއީލުގެ 30 ޖެޓް ބައިވެރިވިއެވެ.
ޔަމަނަށް ވައިގެ ހަމަލާތައް ދިނުމަށް އިސްރާއީލުގެ އަސްކަރީ ޖެޓުތައް ބޭނުންކުރީ، ސައުދީ އަރަބިއްޔާ، މިސްރު އަދި ޖޯރޑަންގެ ވައިގެ ސަރަހައްދެވެ. ހަމަލާތައް ދިނުމަށްފަހު ފިލައިގެން ދިޔައީވެސް އެ ގައުމުތަކުގެ ވައިގެ ސަރަހައްދުގެ ތެރެއިންލާފައެވެ.
އިސްރާއީލުން ދިން ހަމަލާތަކާ ގުޅިގެން ޔަމަނުގެ ހޫތީން ބުނެފައިވަނީ، ކިތަންމެ ހަމަލާއެއްދިނަސް، ކިތަންމެ ޖަރީމާއެއް ހިންގިޔަސް ޣައްޒާއަށް ތާއީދުކުރުން ހުއްޓާނުލާނޭ ކަމަށެވެ.
ކިޔުންތެރިންގެ ހިޔާލު