ޓްރާންސްޕޯޓް މިނިސްޓަރު މުހައްމަދު އަމީންގެ އިތުބާރުނެތް ކަމުގެ މައްސަލައެއް އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅައިފިއެވެ.
އެ ޕާޓީން މިކަން ހާމަކުރީ މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
އެ ބައްދަލުވުމުގައި ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ނާޒިލް ވިދާޅުވީ މިއަދު އެ މައްސަލަ ހުށަހެޅީ އެމްޑީޕީގެ 12 މެންބަރުންގެ ސޮޔާއެކު ކަމަށެވެ.
އެ މައްސަލަ ހުށަހެޅި ސަބަބުތަކުގެ ތެރޭގައި މިނިސްޓަރު އަމީންގެ ގޭގެ ސީސީޓީވީ ފްޓޭޖް ފުލުހުންނަށް ދީފައިނުވުން ހިމެނެއެވެ. ނަމަވެސް އަމީންގެ ގެއިން ބުނެފައި ވަނީ އެގޭގައި ހުރި ކެމެރާތައް ވަނީ ހަލާކުވެފައި ކަމަށެވެ. ފުލުހުން ވެސް ވަނީ އެކަން ކަށަވަރުކޮށްފައެވެ.
މާލޭގެ ގެއެއްގެ މަތިން ޒުވާނަކު ވެއްޓުނު ހާދިސާއާ މިނިސްޓަރު އަމީނާ ގުޅުވައި އިދިކޮޅު އެމްޑީޕީން ދައްކަނީ އެއްވެސް އަސާސެއް ނެތް ވާހަކަތަކެއް ކަމަށް ޕީއެންސީގެ މަޖިލިސް މެންބަރުން އަންނަނީ ބުނަމުންނެވެ. އެގޮތުން އެ ހާދިސާ ހިނގި ރޭ އަމީން ހުންނެވީ ރަސްމީ ދަތުރުފުޅެއްގައި ރާއްޖެއިން ބޭރުގައެވެ.
ކިޔުންތެރިންގެ ހިޔާލު