ތަރައްޤީވެފައިވާ ޤައުމުތަކުގެ ލިސްޓުގައި ރާއްޖެ ހިމެނުމަށްޓަކައި އަމިއްލަ ވިޔަފާރިތައް ކުރިއަރާ ދިއުން މުހިންމުކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު ސަޢީދު މިހެން ވިދާޅުވީ މެލޭޝިއާގެ ބޮޑުވަޒީރު އަންވަރު އިބްރާހިމްގެ ދައުވަތަކަށް ރައީސް ޑރ. މުހައްމަދު މުއިއްޒު ސަރުކާރުގެ އިސްވެރިންނާއެކު އެ ގައުމަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ބޭއްވުނު ދިވެހިރާއްޖެ-މެލޭޝީޔާ ބިޒްނަސް ފޯރަމްގައެވެ.
ޤައުމުގެ ތަރައްޤީއާއި ކުރިއަރާ ދިއުމުގައި، ދިވެހިރާއްޖެ މިހާރު ވަނީ އުއްމީދީ ހާލަތެއްގައި ކަމަށް ވަޒީރު ސަޢީދު ވިދާޅުވިއެވެ.
މީގެއިތުރުން 2040 ވަނަ އަހަރުގެ ކުރިން ތަރައްޤީވެފައިވާ ޤައުމުތަކުގެ ތެރޭގައި ދިވެހިރާއްޖެ ހިމެނުމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނުންފުޅާ އެކު، ޚާއްޞަ މަގުޗާޓެއްގެ ދަށުން މަސައްކަތްތަކެއް ކުރިއަށްދާކަން ފާހަގަކުރެއްވިއެވެ.
މި ލަނޑުދަނޑިއަށް ވާޞިލުވުމުގައި އަމިއްލަ ވިޔަފާރިތައް ކުރިއަރާ ދިއުން ވަރަށް މުހިއްމު ކަމަށްވެސް ފާހަގަކުރެއްވިއެވެ.
މެލޭޝިޔާގެ ބޮޑުވަޒީރު އަންވަރު އިބްރާހީމް ވަނީ ރާއްޖޭގައި އިންވެސްޓްކުރުމަށް އެ ގައުމުގެ ވިޔަފާރިވެރިންގެ ކިބައިން މިއަދު އެދިވަޑައިގެންފައެވެ.
ކިޔުންތެރިންގެ ހިޔާލު