އިސްރާއީލުން ވަރުގަދަ މިސައިލް ހަމަލާތަކެއްދީ ރޭގައި ޣައްޒާއިން ހަލާކުކޮށްލި ސާޅީހަށްވުރެ ގިނަ ހެވީ ވެހިކަލްތަކަކީ، 7 އޮކްޓޫބަރު 2023 ގައި ހަމާސްއިން އިސްރާއީލަށް ހަމަލާދިނުމަށް ބޭނުންކުރި ވެހިކަލްތަކެއް ކަމަށްބުނެ ޒަޔަނިސްޓުން ބޮޑެތި ދޮގުތަކެއް ހަދައިފިއެވެ.

ޣައްޒާގެ އުތުރަށް ރޭގައިދިން ވަރުގަދަ ހަމަލާތަކުގެ ތެރޭގައި، ޖަބަލިއާ ރެފިއުޖީ ކޭމްޕްގައި ހުންނަ މުނިސިޕަލްޓީ ގަރާޖަށްވެސް ވަރަށް ވަރުގަދަ މިސައިލް ހަމަލާތަކެއް ދީފައި ވެއެވެ.
މި ހަމަލާތަކުގައި އެ ގަރާޒުގައި ހުރި ބުލްޑޯޒަރުތަކާއި، ހެވީ ވެހިކަލްތައް އެއްކޮށް ވަނީ ހަލާކުކޮށްލާފައެވެ. އެގޮތުން، އެ ހަމަލާގައި ސާޅީހަށްވުރެ ގިނަ ހެވީ ވެހިކަލް ބޭނުން ނުކުރެވޭ ވަރަށް ވަނީ ހަލާކުވެފައެވެ.

މި ހަމަލާގައި ވެހިކަލްތަކުގައި އަލިފާން ރޯވެފައިވާ މަންޒަރާއި، ލިބިފައިވާ ގެއްލުންތައް ފެންނަ ފޮޓޯތަކާއި ވީޑީއޯތައް އާންމުވެ، އެންމެން އެ ވާހަކަ ދައްކަން ފެށުމުން، ޒަޔަނިސްޓު އަސްކަރިއްޔާއިން ބަޔާނެއް ނެރެ ބުނެފައިވަނީ، އެ ވެހިކަލްތަކަކީ 7 އޮކްޓޫބަރު 2023 ގައި ހަމާސްއިން އިސްރާއީލަށް ހަމަލާދިނުމަށް ބޭނުންކުރި ވެހިކަލްތަކެއް ކަމަށެވެ. އެގޮތުން، އެއްވެސް ހެއްކެއް ދެއްކުމަކާނުލައި، ސާބިތު ނުހިފޭ ބޮޑެތި ދޮގުތައް ހަދައި ބަޔާނެއް ނެރެފައި ވެއެވެ.

އެހެން ނަމަވެސް، ޣައްޒާގެ މީޑިއާ އޮފީހުން ބުނެފައިވަނީ، އެ ވެހިކަލްތަކަކީ، ހަމަލާތައް ހުއްޓާލުމަށް ވެވުނު އެއްބަސްވުމުގެ ދަށުން، މީގެ ހަފްތާތަކެއް ކުރިން ޣައްޒާއަށް އެތެރެކޮށްފައިވާ ވެހިކަލްތަކެއް ކަމަށެވެ. އަދި އެއީ، މިސްރުގެ ކުންފުންޏަކަށް ނިސްބަތްވާ ވެހިކަލްތަކެއް ކަމަށްވެސް ބުނެފައި ވެއެވެ.

އިސްރާއީލުން ބޮންއަޅައި ހަލާކުކޮށްލި ބުލްޑޯޒަރާއި، ހެވީ ވެހިކަލްތަކަކީ، އިސްރާއީލު ސިފައިން ބޮމާއި މިސައިލުން ދޭ ހަމަލާތަކަށްފަހު މީހުން ސަލާމަތް ކުރުމުގެ މަސައްކަތުގައާއި، ގާތައް ނަގައި މަރުވެފައިވާ މީހުންގެ ހަށިތައް ނަގައި، އަދި ޒަޚަމްވެފައިވާ މީހުން ސަލާމަތް ކުރުމާއި، މަގުތައް ހުޅުވުމުގެ މަސައްކަތުގައި ބޭނުންކުރަމުން އައި ވެހިކަލްތައް ކަމަށެވެ.

ޒަޔަނިސްޓުން މިސައިލް ހަމަލާދީ ހަލާކުކޮށްލި ވެހިކަލްތަކަކީ، ޣައްޒާގެ އުތުރުގައި މީހުން ސަލާމަތް ކުރުމުގެ މަސައްކަތުގައި ރެއާ ހަމައަށް ބޭނުންކުރަން ހުރި ހަމައެކަނި ސާމާނުތައް ކަމަށް، ޣައްޒާ ސިވިލް ޑިފެންސުން ބުނެފައި ވެއެވެ. ޒަޔަނިސްޓުންގެ ހަމަލާތަކުގައި ވައްޓާލާ ގެތަކާއި އިމާރާތްތަކުގެ ދަށުވާ މީހުން ސަލާމަތް ކުރުމަށް މިހާރު ކުރަމުންދާ މަސައްކަތަށް ކުރިމަތިވި އިތުރު ޕްރެޝަރެކެވެ.