މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ބާރު ދުވެލީގައި ކުރިއަށްދާ ކަމަށް ލޯކަލް ގަވާމެންޓް މިނިސްޓްރީން ބުނެފިއެވެ.
އެ މިނިސްޓްރީން ބުނީ މިހާތަނަށް މަޖީދީމަގުގެ ކާނުތަކާއި ކަނބާ އައިސާރަނި ހިނގުމުގެ ކާނުތައް އެއްކޮށް ސާފުކޮށް ނިންމާލާފައިވާ ކަމަށެވެ. އަދި މިހާރު ކުރިއަށްދަނީ ޝަހީދު ޢަލީ ހިނގުމުގެ ކާނުތައް ސާފުކުރުމުގެ މަސައްކަތް ކަމަށް އެ މިނިސްޓްރީން ބުންޏެވެ.
މި މަސައްކަތް ފެށިފައިވަނީ މިދިޔަ މަހުގެ 8 ވަނަ ދުވަހު މަޖީދީ މަގުންނެވެ. މިއީ ވާރޭވެހި ފެންބޮޑުވުމުގެ ސަބަބުން މާލޭގައި ދިރިއުޅޭ ފަރާތްތަކަށް ދިމާވާ އުނދަގޫތައް ކުޑަކުރުމުގެ ގޮތުން ކުރިއަށްގެންދާ މަސައްކަތެކެވެ.
“މާލޭގެ މަގުތަކުގައި ފެންބޮޑުވާ މައްސަލައަކީ މާލެއަށް ދިމާވެފައިވާ އެންމެ ބޮޑު އެއް މައްސަލަ. މި މަސައްކަތް ނިމުމުން ވާރޭވެހި މާލޭގައި ފެންބޮޑުވާ މައްސަލައަށް ކޮންމެވެސްވަރެއްގެ ހައްލެއް ލިބޭނެ ކަމަށް އަޅުގަނޑުމެން ޤަބޫލުކުރަން،” އެ މިނިސްޓްރީން ބުންޏެވެ.
މި މަސައްކަތް 6 މަސް ދުވަހުގެ ތެރޭގައި ނިންމާލެވޭނެ ކަމަށް އެ ވުޒާރާއިން މީގެކުރިން ވަނީ ހާމަކޮށްފައެވެ. މިއީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ އިރުޝާދުގެ ދަށުން ކުރިއަށްގެންދާ މަޝްރޫޢެއް ކަމަށްވެސް އެ ވުޒާރާއިން ވަނީ ބުނެފަައެވެ.
ކިޔުންތެރިންގެ ހިޔާލު