ވަކިން ސިނގިރޭޓް ވިއްކުމާއި ސިނގިރޭޓް ބުއިމަށް ހުއްދަ ނެތް ތަންތަނުގައި ސިނގިރޭޓް ބުއިމުގެ ކަންކަން ހުއްޓުމަށް ހެދިފައިވާ ގާނޫނުތައް ތަންފީޒު ކުރުމުގެ ކަންކަން ވަރުގަދަކުރުމަށް މަޝްވަރާކޮށްފިއެވެ.
އެ މަޝްވަރާތައް ކޮށްފައިވަނީ ހެލްތު މިނިސްޓަރު އަބްދުﷲ ނާޒިމް އިބްރާހީމާއި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ކުރެއްވި ބައްދަލުކުރެއްވުމެއްގެ ތެރެއިންނެވެ.
ހެލްތު މިނިސްޓްރީގައި ބޭއްވި އެ ބައްދަލުވުމުގައި ފުލުހުންނާއި ކަސްޓަމްސް އާއި ހެލްތު ޕްރޮޓެކްޝަން އެޖެންސީ (އެޗްޕީއޭ)އާ ގުޅިގެން ގާނޫނު ތަންފީޒުކުރުމުގެ ކަންކަން ހަރުދަނާކުރުމަށް ކަންތައްތަކެއް ކުރުމަށް ވަނީ މަޝްވަރާކޮށްފައެވެ.
އެ ބައްދަލުވުމުގައި ވަކިން ސިނގިރޭޓް ވިއްކުމާއި، ހުއްދަ ނުދޭ ކެފޭ ރެސްޓޯރަންޓް ތަންތަނުގައި ސިނގިރޭޓް ނުވަތަ ޝީޝާ ބުއިމާއި ވޭޕް ބޭނުންކުރުން ފަދަ ކަންކަން ހުއްޓުވުމަށް ކަމާ ގުޅުންހުރި މުއައްސަސާތައް ގުޅިގެން މަސައްކަތްކުރުމަށް ވަނީ ނިންމައިފައެވެ.
އެ ބައްދަލުވުމުގައި މިނިސްޓަރު ނާޒިމާއި މިނިސްޓަރު އިހުސާންގެ އިތުރުން ކޮމިޝަނާ އޮފް ޕޮލިސް އަލީ ޝުޖާއު އަދި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ ވެސް ބައިވެރިވަޑައިގެންނެވިއެވެ.
