ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑިރެކްޓަރުންގެ ބޯޑުގެ މެންބަރުކަމަށް، މ. ބްލޫނައިލް، އިބްރާހިމް ޠަޢާމު މުޙައްމަދު އައްޔަނުކުރައްވައިފިއެވެ. މި އައްޔަނުކުރެއްވުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން މިއަދު ވަނީ ކަށަވަރުކޮށްދެއްވާފައެވެ.
މި އައްޔަނުކުރެއްވުމަކީ، ކުރިން އެ ބޯޑުގެ މެންބަރުކަމުގައި ހުންނެވި ހއ. ފިއްލަދޫ، މަބުސްތާނުގެ، މުޙައްމަދު ވަހީދު 6 އޭޕްރިލް 2025 ގައި އެ ބޯޑުން ވަކިކުރެއްވުމަށްފަހު ގެނެވުނު ބަދަލެކެވެ.
އެޗްޑީސީގެ ބޯޑަށް މި ބަދަލު ގެނެވެމުންދަނީ، ބިންވެރިޔާ ސްކީމްގެ ދަށުން ޝަރުތު ހަމަނުވާ ފަރާތްތަކަކަށް ހުޅުމާލެއިން ގޯތި ދޫކުރެވިފައިވާ ކަމަށް ތުހުމަތުކުރެވޭ މައްސަލައާ ގުޅިގެން އެޗްޑީސީގެ ބޯޑުގެ ބައެއް މެންބަރުން ކުރިން ސަސްޕެންޑްކުރެވިފައިވަނިކޮށެވެ. އަދި މި މައްސަލައާ ގުޅިގެން އެ ކުންފުނީގެ އޭރުގެ މެނޭޖިންގ ޑިރެކްޓަރ ފަޟުލް ރަޝީދު ސަސްޕެންޑްކުރެވުމާ ގުޅިގެން އޭނާ ވަނީ މަޤާމުން އިސްތިއުފާ ދެއްވާފައެވެ.
މިހާރު އެޗްޑީސީގެ މެނޭޖިންގ ޑިރެކްޓަރުގެ މަޤާމުގައި ހުންނެވީ މުޙައްމަދު މައުރޫފް ޖަމީލެވެ.
