ސައުދީ ފަންޑު ފޮރ ޑިވެލޮޕްމަންޓުން 25 މިލިއަން އެމެރިކާ ޑޮލަރުގެ ލޯނު އެހީގެ ދަށުން ހުޅުމާލޭގެ ދެވަނަ ފިޔަވަހީގައި ޢިމާރާތްކުރެވޭ 400 ސޯޝަލް ހައުސިންގ ޔުނިޓުގެ މަޝްރޫޢު މިއަދު ރަސްމީކޮށް ފަށައިފިއެވެ.
“400 އެފޯޑަބަލް ހައުސިންގ ސްކީމް ޕްރޮޖެކްޓް” ގެ ނަމުގައި ކުރިއަށްގެންދެވޭ މި މަޝްރޫޢު ރަސްމީކޮށް ފެށުމުގެ ޙަފްލާ މިއަދު ހުޅުމާލޭގައި ބޭއްވުނެވެ. މި ޙަފްލާގައި މަޝްރޫޢު ރަސްމީކޮށް ފައްޓަވައިދެއްވީ ސައުދީ ފަންޑުގެ ޗީފް އެގްޒެކެޓިވް އޮފިސަރ (ސީއީއޯ)، އަލްފާޟިލް ސުލްޠާން ބިން ޢަބްދުއްރަޙްމާން އަލް-މަރްޝަދާއި ދިވެހިރާއްޖޭގެ މިނިސްޓަރ އޮފް ފިނޭންސް އެންޑް ޕްލޭނިންގ އަލްފާޟިލް މޫސާ ޒަމީރެވެ.
މި މަޝްރޫޢުގެ ދަށުން ހުޅުމާލޭގެލޭގެ ދެވަނަ ފިޔަވަހީގައި 400 ސޯޝަލް ހައުސިންގ ޔުނިޓު ޢިމާރާތްކުރުމަށް ވަނީ ހަމަޖެހިފައެވެ. މި މަޝްރޫޢަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، ގިނަ ރައްޔިތުންނަށް ގެދޮރުވެރިކަމާއި ބޯހިޔާވަހިކަން ފަހިކޮށްދިނުމަށް އެޅޭ މުހިންމު ފިޔަވަޅެކެވެ.
ސައުދީ ފަންޑަކީ ދިވެހިރާއްޖޭގެ ތަރައްޤީގެ މަސައްކަތުގައި އިސް ދައުރެއް އަދާކުރާ ބައިވެރިއެކެވެ. މި ފަންޑުން މިހާތަނަށް ދަތުރުފަތުރު، ޞިއްޙަތު، ބޯހިޔާވަހިކަން އަދި މަސްވެރިކަން ފަދަ އެކި ދާއިރާތަކަށް 470 މިލިއަން ޑޮލަރަށް ވުރެ ގިނަ އަދަދެއްގެ އެހީ ވަނީ ފޯރުކޮށްދީފައެވެ. ޚާއްޞަކޮށް، 2024 ވަނަ އަހަރުގެ މޭ މަހު، ސައުދީ ފަންޑުން ވަނީ ދެ މުހިންމު މަޝްރޫޢަކަށް 150 މިލިއަން ޑޮލަރުގެ ލޯނު ދޫކޮށްފައެވެ. މީގެ ތެރެއިން 100 މިލިއަން ޑޮލަރު ދޫކޮށްފައިވަނީ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށެވެ. އަދި 50 މިލިއަން ޑޮލަރު ދޫކޮށްފައިވަނީ ޞިއްޙީ ދާއިރާ ތަރައްޤީކުރުމުގެ މަޝްރޫޢަށެވެ.
ސައުދީ ފަންޑަކީ 1974 ވަނަ އަހަރު ސައުދީ ސަރުކާރުން އުފައްދާފައިވާ ފަންޑެކެވެ. މި ފަންޑުގެ މައިގަނޑު މަޤްޞަދަކީ ތަރައްޤީވަމުން އަންނަ ޤައުމުތަކުގައި ތަރައްޤީގެ މަޝްރޫޢުތައް ހިންގުމަށް މާލީ އެހީތެރިކަމާއި އެއްބާރުލުން ފޯރުކޮށްދިނުމެވެ. މި ފަންޑުން ލުއި ލޯނާއި ހިލޭ އެހީގެ ޒަރީޢާއިން ދެމެހެއްޓެނިވި ތަރައްޤީއަށް މަސައްކަތްކުރަމުންދެއެވެ.
