ބިދޭސީންގެ ފީ އާއި ޖޫރިމަނާގެ ގޮތުގައި ނުދައްކާ ހުރި 1.7 ބިލިއަން ރުފިޔާގެ ތެރެއިން 1.6 ބިލިއަން ރުފިޔާ ލިބިފައިވާ ކަމަށް ހޯމްލޭންޑް މިނިސްޓްރީން ބުނެފިއެވެ.
ޕީއެސްއެމްގެ “ރާއްޖެ މިއަދު” ޕްރޮގްރާމުގައި ވާހަކަދައްކަވަމުން ހޯމްލޭންޑް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހީމް ވިދާޅުވީ ބިދޭސީންނަށް ވަޒީފާ ދީފައިވާ ފަރާތްތަކުން ބިދޭސީންގެ ފީތައް ގަވާއިދުން ދައްކަމުންނުދާ މައްސަލަ ބޮޑުވެފައިވާ ކަމަށެވެ.
މި ސަރުކާރުގެ މަސައްކަތުން ބިދޭސީ މަސައްކަތްތެރިންގެ ފީ ގަވާއިދުން ދައްކާ ފަރާތްތަކުގެ އަދަދު 50 ޕަސަންޓަށްވުރެ މައްޗަށް ގޮސްފައިވާ ކަމަށާއި ވެރިކަމާ ހަވާލުވި އިރު، އެ އަދަދު ހުރީ 22 ޕަސަންޓުގައި ކަމަށް އޭނާ ވިދާޅުވިއެވެ.
މާޖިދު ވިދާޅުވީ ހޯދިފައިވާ ފައިސާގެ 99 އިންސައްތައަކީ މި ސަރުކާރުގެ ތެރެއިން ހޯދިފައިވާ ފައިސާ ކަމަށާއި މާނައަކީ 1.6 ބިލިއަން ރުފިޔާ މި ސަރުކާރަށް ހޯދިފައިވާ ކަމަށެވެ. އެހެންނަމަވެސް އެ ފީތަކުގެ ގޮތުގައި ދައުލަތަށް ލިބެންޖެހޭ 900 މިލިއަނަށްވުރެ ގިނަ ރުފިޔާ އަދި ނުދައްކާ އެބަހުރި ކަމަށް އޭނާ ވިދާޅުވިއެވެ.
ހޯމްލޭންޑް މިނިސްޓްރީން ވަނީ މިދިިޔަ އަހަރުގެ ސެޕްޓެމްބަރު މަހު ބިދޭސީންގެ ފީ އާއި ޖޫރިމަނާގެ ގޮތުގައި 100،000 ރުފިޔާއަށްވުރެ މަދުން ފައިސާ ދައްކަން ހުރި ފަރާތްތައް އެ މަހުގެ 16 ގެ ކުރިން އެ ފައިސާ ދައްކައި ހަލާސްކުރަން އަންގައިފައެވެ. އެގޮތަށް އަމަލުނުކުރާ ކުންފުނިތަކުގެ ނަންތައް އާންމުކުރާނެކަން އަންގައި، މިދިޔަ އަހަރު އާންމުކުރަން ފަށައިފައެވެ.
ކިޔުންތެރިންގެ ހިޔާލު